DAGHANG dawunggan ang nitingkag sa dihang gipahibawo ni Cebu City Mayor Michael Rama nga iyang laslasan ang financial assistance sa mga senior citizen sa dakbayan og katunga gikan sa P12,000 ngadto na sa P6,000 matag tuig.

Gibasehan sa mayor sa iyang paglaslas sa maong financial assistance mao ang wala pag-approved sa konseho sa iyang proposed budget nga P10.5 billion karong tuiga.

Sa ato pa, iyang gipasanginlan ang konseho nga gidominar sa Bando Osmeña Pundok Kauswagan (BOPK) o mga kaalyado ni kanhi mayor Tomas Osmena kay P5.89 bilyones ra ang giaprobahan niini nga budget karong tuiga.

Pero nganong maigo man ang financial assistance sa mga senior citizen nga aduna na man diay kini gahin nga giprobahan sa konseho?

Ubos sa budget ordinance nga napasar ug naaprobahan adunay P720 million nga financial assistance alang sa 60,000 ka mga senior citizens sa siyudad.

Kay lagi aprobado na man, obligado unta ang mayor nga mohatag niini ilabi na kay mao man kini ang iyang gisaad niadtong naghinangat pa ang eleksiyon.

Masabot man tuod nato nga daghang basic services nga maapektuhan tungod kay katunga ra man sa iyang proposed budget ang gitugot sa konseho, apan angay untang hunahuna-on sa mayor nga kon unsay gigahin mao usab kini madawat sa gigahinan.

Unfair sa mga senior citizen kon ang budget nga alang kanila adto mapahimuslan sa uban.

Hangtod nga di makahatag og igong katarungan ug makombinsi sa mayor ang mga senior citizen, magpabilin ang kaligotgot sa atong mga katiguwa­ngan ug di mawala sa ilang alimpatakan ang saad nga wa niya tumana.