DEAR Noy Tikyo,
Maayong adlaw. Buot unta kong magpatambag nimo bahin ning babaye nga nakasamok sa akong kinabuhi. Tagoa lang ko sa ngan nga Allan, 21 anyos. Nadebelop man god ang akong pagbati ngadto sa asawa sa akong silingan kinsa tua sa gawas sa nasud nanarbaho.
Nagsugod ang tanan human siya nagpatabang nako og karga sa gipamalengke niyang bugas kay naatlan man nga miagi ko sa ilang balay. Wala ko magdahom nga mao na diay kadto ang sinugdanan nga magkasuod mi niya. Kanunay na mi magkita ug magkuyog manuroy.
Sa tinuod lang, duna koy uyab. Apan mora og nawala ko sa among relasyon tungod sa among silingan. Kay imbis nga tagaan ko og patagad ang akong uyab, tua na man ko magyampungad sa babaye.
Namatikdan sab baya nako nga mora og duna say gusto ang asawa sa among silingan nako. Gani nangutana man siya kanako kon duna ba koy kasinatian bahin sa sex sa dihang nagka-istorya mi. Nanginit baya ko niadtong higayona apan nagpugong lang ko sa akong kaugalingon.
Sa pagkakaron, mora og hinay-hinay nang nawala ang akong pagbati sa akong uyab. Buotan baya ning akong uyab. Unsa may akong buhaton?
Allan
*****
Allan,
Aw, kon tinguha nimo nga magpuyo nga malinawon, mas maayo nga pilion nimo ang imong uyab inay nianang asawa sa imong silingan. Kay kon paundayonan nimo ang imong pagbati nianang bayhana, segurado nga magubot ang imong kinabuhi kay segurado man gyud nga kon mahibawo ang iyang bana o iyang mga kabanay nga nagtinguha ka sa maong babaye, masuko man gyud ni kanimo.
Bata ka pa baya kaayo nga matumpawak niining kahimtanga, basin og tibuok kinabuhi nimo kining basulan. Wa ka may mapaabot nga maayong kaugmaon kon makigrelasyon ka nianang bayhana kay duna na man siyay bana, busa mintras nga duna pay panahon, likayi na siya.
Imbis nga makigrelasyon ka nianang bayhana, mas maayo nga palambuon mo na lang ang inyong relasyon sa imong uyab. Ihurot og hatag ang imong pagtagad ngadto kaniya inay ngadto sa minyo mong silingan. Wala ka pay mahimong problema unya magmalinawon sab ang imong kinabuhi.
Noy Tikyo