MATANAO, Davao del Sur -- Patay na ang baka nga gihimugso nga unom ang tiil ug naalaang "666."

Ang baka namatay kagahapon sa kaadlawon hinungdan nga gipalubong na lamang sa tag-iya.

Gibunyagan sa pamilyang Natividad sa Barangay Kapoc ang nahimugsong hayop nga si "Baby baka" diin talagsaon ang kahimtang tungod sa iyang upat ka tiil sa unahan ug duha sa likod nga bahin.

Dili sab normal ang nawong kay libat ang mata ug ang ikog wa matunong sa iyang lubot.

Nahimugso ang baka niadtong Enero 6 sa alas 6:00 sa buntag ug unom ang tiil mao nga naalaan sa mga silingan nga "666."

Una nang gikanayon sa Provincial Veterinary Office (PVO) nga dili magdugay ang baka sanglit 70 porsiyento lang ang tsansa nga mabuhi kini bisan pa man og gipatutoy sa tag-iya og gatas pinaagi sa “feeding bottle.”

Ang baka maoy ikalimang anak sa siyam ka tuig nga inahan ug mao lang ang nalahi sa upat niya ka igsuong baka.

Hangtud karon naglibog ang tag-iya sa hayop kon nganong naingon sa pagkahimugso ang baka nga unta giayo man nila kini pag-atiman. (Orlando B. Dinoy)