TULO ka mga gitahapang miyembro sa "gunrunning syndicate" ang nasikop sa Criminal Investigation and Detection Group (CIDG)-Davao sa gilusad nga entrapment operation alas 3:30 sa hapon, Biyernes, didto sa mga dalang Duterte ug Ilustre, Barangay 3-A Poblacion, siyudad sa Davao.
Ang mga nasikop mao sila Ronald Austria Galendes, alyas Mac-Mac, 28, molupyo sa Kamagong Street, Nova Tierra; Adell Remarca Gravador, alyas Aging, 21, taga Poblacion Malita, Davao Occidental; ug Jay Anthony Lazaro, alyas Tangkag, 31, residente sa Barangay Bangkas, Toril District.
Subay sa press release sa CIDG, nasayrang positibong gidawat sa usa sa mga suspek ang kuwarta nga boodle money kinsa gipaibabwan og tulo ka tag-P2,000 balor sa .45 kalibre nga pistola hinungdan nga giposasan sila, ang duha mohimo pa unta sa pagdagan apan nasikop.
Si CIDG-Davao Director Joel C. Pernito nagsulti nga walay nadamay atol sa kasamok sa ilang pagdakop sa tulo ka suspek.
"There was a brief hunt between the arresting officers and one of the three suspects - a commotion followed in the complex but the team immediately calms down the situation and fortunately no one was hurt during the operation," sulti ni Pernito.
Dugang sa opisyal nga ang tulo ka miyembro sa notorious group nga gipanganla'g "Trip Gang" usa ka gun-running syndicate sa rehiyon, partikular sa siyudad sa Davao ug anaa sila sa listahan sa mga high profiled criminals.
"We learned that this people are not only involved in gun-running but also in other crimes such as gang war, robbery and holdup, and series of shooting incidents involving minor as victim -- one of it took placed in Victoria Plaza in Bajada last month," sulti sa opisyal. (Jeepy P. Compio)