DAVAO ORIENTAL -- Miabot na sa 292 ka mga pamilya ang gipabakwit sa lokal nga kagamhanan sa probinsiya sa Compostela Valley ug Davao del Norte human gibaha ang pito ka munisipalidad ug pipila ka bahin sa dapit resulta sa way puas nga pagbunok sa ulan kagahapon, Sabado.

Kini ang gibutyag ni Provincial Disaster Risk Reduction and Management Council (PDRRMC) officer Raul Villocino atol sa pakighinabi kaniya dxAB Radyo Patrol.

Sumala sa opisyal nga gipaubos ang pipila ka dapit sa probinsiya sa preemptive evacuation pinaagi sa mando ni Governor Arturo T. Uy.

"Gipahigayon dayon nato ang preemptive evacuation sa mga dapit nga naapektuhan sa pagbaha, alayon kini sa mando sa atong gobernador," sulti ni Villocino.

Subay sab sa datus nga nadawat sa Superbalita sa Office of the Civil Defense (OCD)-Davao alas 2:40 sa hapon kagahapon, Sabado, nasayrang dunay 292 ka mga pamilya ang gipabakwit sa lokal nga kagamhanan sa duha ka probinsiya.

Sa probinsiya sa Davao del Norte, ang New Corilla sa Asunsion dunay unom ka pamilya ang gipabakwit nga nagagikan sa Purok 1, 10, ug 11 sa Sagayen; 8 sa mga Purok sa Sitio Canatan samtang wa pa masayri ang ihap sa Poblacion Napungas, Dona Andrea, Sonion, Camansa, Liguyon ug Buan.

Sa probinsiya sa Compostela Valley sa munisipalidad sa Monkayo sa Purok 2, Mt. Diwata, dunay 2 ka pamilya; Kidawa Laak dunay 110; Nabunturan sa Purok 8 Magsaysay 21; Purok Magading 12; Montevista Purok 5 New Visayas 43; ug Compostela, Barangay Maparat 50.

Dunay siyam ka mga evacuation centers diin maoy gihiklingan karon sa mga mibakwit nga residente gikan sa pito ka munisipalidad nga gilangkuban sa 16 ka mga barangay.

Gawas niini, naguba sab ang tulay sa Bailey Bridge sa Barangay Depot Upper Ulip, Monkayo lakip na ang Naboc Dike tungod sa pagbaha.

Subay sa impormasyon ug ihap nga gibutyag sa opisyal, wa pay labot niini ang padayong gipabakwit sa mga rescuer kagahapon sa hapon.

Dugang ni Villocino, dunay mga natalang pagtaas sa kasapaan, kini subay sa ilang datus sa water level censor.

Mitaas ang tubig sa San Roque, New Bataan .37 meters; Limbo .55 meters; ComVal .161 meters; Asuncion River .45 meters.

"As of 12 noon today (Sabado), mao nay pagtaas sa tubig sa atong kasapaan, padayon pa kining motaas kung magpadayon ang ulan," sulti sa opisyal.

Gisulti sab niini nga naka-alerto karon ang lokal nga kagamhanan sa probinsiya aron paghikling sa mga residente ngadto sa mga gym sa tunghaan.

"Naka-alerto karon ang atong mga rescuer sa atong probinsiya and in fact yesterday pa (Biyernes) gisugdan na nato sa pag-rescue didto sa mga dapit sa Montevista," saysay ni Villocino.

Di sab maagian ang dalan nga nagkutay sa El Salvador ug New Corilla lakip na ang padulong og Laak ug Asuncion gumikan kay dunay landslide ang natigayon.

Alas 3:00 sa hapon adlaw'ng Biyernes, ang PDRMMC nakatala og .22 meters gitas-on sa pagbaha sud sa kinse minutos.

"Naa ta'y natala nga .22 meters every 15 minutes sa pag-ulan, di man kaayo kusog pero napundo ang ulan mao ni resulta nga mibaha," pung niini.

Sukad sa pagkalap ning maong balita padayon ang gihimong preemptive operation sa mga dapit sa Davao Oriental ug Compostela Valley Province.

Ang pag-ulan nga nasinati sa Davao region bunga sa low pressure area (LPA) nga anaa sa 540 kilometros sa habagatang bahin sa Mindanao kagahapon sa udto.

Sumala sa Philippine Atmospheric, Geophysical and Astronomical Services Administration (Pagasa) nga ang nakit-ang LPA magdala'g ulan diin matawag na kini og tropical depression nga kung matapok mahimo kining bagyo nga tawgon og "Agaton."

Di, suma pa, kini mo-landfall gumikan gisubay niini ang sidlakang bahin sa lawod, hinungdan nga magdala lamang kini og mga pag-ulan nga moresulta sa pagbaha, panalugdog ug kasarangan nga mga pagbalud sa kadagatan.

Dugang sa Pagasa nga molungtad hangtud Enero 14 ang nasinating pag-ulan sa Mindanao labi na sa Davao region ug sa kasikbit nga dapit sa Kabisay-an.