KANHI Barangay Kapitan patay nang napalgan niadtong Biyernes sa buntag nga nag-ubo sa kasagbutan sa hilit nga lugar sa bukiran sa Barangay sa Bulangsuran, lungsod sa Samboan.

Unang gikatahong nagbarog pa ang iyang kinatawo dihang napalgan sa mga tawo sa dapit apan, gihimakak kini sa kapulisan nga uwahing naabot sa dapit.

Ang 53-anyos nga biktima (ngalan gipungan ning mantalaan), minyo ug kanhi kapitan sa Calatagan, patay na dihang naabtan sa kapulisan nga nagbanig sa iyang raincoat.

Si PO2 Joseph Rodney Belangoy, sakop sa Alert Team sa Samboan police kinsa usa sa unang nirespondi sa lugar, nisugilon sa dySS Super Radyo ug Sun.Star Superbalita nga walay foul play ang kamatayon sa biktima.

Sumala pa niini nga sa paghiling sa ilang municipal health officer, ang kanhi kapitan namatay sa ataki sa ka­singkasing.

Dugang sa taho nga nahanaw kini niadtong Enero 9 busa gipangita siya sa ilang kabanay, apan nakugang nalang ang mga residente sa lugar nga nakit-an kining patay na.

Sa imbestigasyon sa kapulisan, ang mga tawo sa lugar giingong nakakita sa biktima nga may kuyog nga babaye nga sakay sa iyang motorsiklo nga wala ma­klaro ang nawong niini human nagtabon.

“Natingala lang sab mi kay didto man siya sa kalibunan gihapin tong raincoat destansiya og 20 metros sa gi-parkingan sa motorsiklo,” dugang ni PO2 Belangoy.

Giklaro niini nga wala nagbarog ang kinatawo sa kanhi kapitan dihang ilang naabtan.

Giklaro niini, siya mismo nakakita nga nag-ubo kini ug walay nakit-ang katingalahan ingon man giingong nagbarog ang kinatawo, subay sa mga tabitabi.

Sumala pa niini nga posibling padung pa siguro siya sa kalipay uban sa babaye unya giataki sa kasingkasing hinungdan nga namatay.

Gipasabot niya nga dunay nakakita nga may sakay nga babaye pero walay nakakitang duna kini gikadulog sa maong kasagbutan kon dili mga sultisulti lang walay kamatuoran.

Gisugyot gihapon nila sa kabanay nga ipaubos sa autopsy ang patayng lawas, niini wala sab mawala ang mga butang sa kanhi kapitan.

Samtang pangitaon nila kun si kinsa kadtong babaye nga gikauban niini sa motorsiklo sa wala pa siya mahanaw ug nakit-ang patay.