KUMUSTA kamo, mga higala, ning adlaw nga Lunes, Enero 13. Dali ra kaayo ang panahon, daw kagahapon lang man nato gisugat ang Bag-ong Tuig, karon tunga naman sa buwan.

Ang uban mireklamo kay dali ra daw makatiguwang ang paspas nga dagan sa panahon. Bitaw, wa ra nato namatikdan gumikan sa atong ka-busy mao nga makaingon kita nga paspas ang mga adlaw.

Unang adlaw kini sa atong topiko nga papulsuhan ninyo labot sa pagpahigayon og Night Market sa dakbayan sa Davao.

Kini gihimo sa siyudad isip tubag sa problema sa trapiko ug pagguot sa sidewalk.

Ang maong lakang gisuportahan ni Davao City Mayor Rodrigo R. Duterte ug gisalig kini sa Demolition and Drainage Management Unit (DDMU) nga gidumala ni Ret. Col. Yusop Jimlani.

Giaprubahan sab kini sa Davao City Council.

Giingong gipahimutang kini sa dalang Roxas, Ilustre Street, Governor Duterte Street, Aquino Street sa Agdao, ug Alvarez Street sa Barangay 27-C nga abli gikan Lunes hangtud Biyernes, gikan alas 4:00 sa hapon hangtud alas 12:00 sa tungang gabii.

Sa weekend street market sa San Pedro ug Alvarez magsugod alas 7:00 sa gabii hangtud alas 3:00 sa kaadlawon diin mobayad og P4 matag gabii ang dunay matag 1.5 to 2-meter stall didto sa City Treasurer's Office.

Maayo ang plano, diin alang sa pipila ka negusyante nga anaa ang paninda sa mga nag-unang sidewalk sa siyudad, di sila makabawi gumikan ang maong mga oras sagad tingpahuway na sa mga tawo ug wala nay magtikaw-tikaw sa kadalanan.

Mga higala, ania ang tipik sa pamahayag sa opisyal sa Demolition and Drainage and Management Unit chief Yusop Jimlani:

Di mosugot

"Dili man sila angay mabalaka kay kung disiplinado sila, dili ni mahitabo nga pagpatuman. Ang problema sa ila, dili sila mosugot nga ipatuman ni. Nganong di man sila mosugot nga si Mayor naman mismo nag-ingon? Dapat gyud silang mosunod." Yusop Jimlani, Chief, Demolition and Drainage Management Unit (DDMU)

Aron tunhay ang pag-agi

"Husto ni nga pamaagi para dako nag hawan ang sidewalk. Tan-awa ang San Pedro? Halos di na ka makaagi. Diha na gud ka moagi sa kalsada kay molikay man ka sa agianan kay napuno naman sa mamaligyaay." Raymund Agatia, Dining Staff, Morisco Ristorante Italiano Bar