HUWEBES na! Kumusta ang atong mga panikay-sikay diha mga friends? Hala sige, padayon lamang friends kay ana gyud na ang life, kinahanglan maningkamot.
Sa pagpadayon friends, mikakak gyud ang pipila ka vendors sa atong pakighinabi kanila ug ilahang gipagawas ilang panlataw sa ipatumang night market sa Davao City.
Sumala nila nga kung magpadayon ang maong mando sa Mayor makulban suma pa sila og kaldero kay wala sila'y halin sa dapit nga butangan sa ilang mga paninda.
Ang maong panlataw subay sab kini sa ilang unang nasinati dihang gipamutang sila sa Roxas Avenue sa nakalabay nga Septyembre 2013.
Nagkalain-lain ang panlantaw sa mga vendors sa pagpatuman niini gumikan alang nila daw naninda sila sa usa ka lugar nga mingaw sama sa sementeryo.
Dugang pa nga daghan na og mga katuigan nga nagtinda sila sa ilang naandan nga dapit ug nganong karon ra sila giingon niini.
Sa kabahin ni demolition chief Yusop Jimlani nga misamot na sa kasamtangan kaguot ang dagan sa trapiko sa dakbayan hinungdan nga ibutang sila sa mas luag nga dapit aron dagan sa trapiko matunhay.
Mga Super Suki ania na ang atong mga nahinabi:
========
"Okay kaayo na para nako kay para dako na ang kalsada sa sidewalk dili na magdasok kung mangagi. Kung ibutang mi didto sa Roxas okay lang gihapon wala ta'y mahimo order man sa Mayor, order niya igo ra ta mosunod," Vina T. Duay, sidewalk vendor, Magallanes Street, Davao City
========
"Mas maayo aron isa na ang adtoan, naa na didto tanan. Mabibo na hinuon didto kay klase-klase ang mga tinda labi na'g ukay-ukay adtuonon gyud na sa tawo," Claudine Joy Amag, Staff, Greenwich, Gaisano Mall of Davao