DEAD on arrival sa balay tambalanan ang usa ka lalaki human giluba sa wala mailang suspetsado samtang anaa kini sa Barangay Carmen, siyudad sa Cagayan de Oro.

Giila ang biktima nga mao si Galo Sabanal Jr., hingkod ang edad, residente sa Aluba, Macasandig, ning siyudad.

Sa inisyal nga report sa Northern Mindanao Medical Center (NMMC), nasuta nga gihatod lamang kini sa usa ka motorela driver. Saysay sa driver nga mipara kaniya si Sabanal ug nihangyo magpahatod sa balay tambalanan.

Gani sa pirmero, wala siya masayod nga samdan diay ang biktima apan dihang misulti kini nga giluba kini, iyang gipakusog iyang dagan ug mipaingon sa balay tambalanan.

Natingala na lamang ang driver dihang nakuyapan kini sulod sa iyang motorela ug dihang gitabang sulod sa NMMC, gideklarar na kini sa mga doctor ug patay na dihang gihidangat.

Nakaangkon diay kini og pito ka pulgada nga samad sa iyang abaga ug maayong pagkaigo sa baga sa biktima. Ang kaso giimbestigahan na sa Police Station 4 sa Carmen ning panahona. (SVB)