HALOS duha ka adlaw nga stranded ang pasahero sa airplane human nasinati sa Northern Mindanao ang dili mayo nga panahon gumikan sa low pressure area (LPA).
Gibutyag sa Philippine Atmospheric, Geophysical and Astronomical Services (Pagasa)-Northern Mindanao nga magpabilin kining LPA ug wala pa gitaas sa bagyo.
Kung mahimong bagyo, tawagon kining bagyong Agaton.
Niadtong Sabado, mokabat sa 15 ka flights ang kanselado sa Laguindingan Airport, Laguindingan, Misamis Oriental tungod sa zero visibility ug walay puas nga pag-ulan.
Mipahibalo usab ang Cebu pacific airline sa mga nakansela nila nga flights nga mao ang 5J381 (Manila to Cagayan de Oro); 5J382 (Cagayan de Oro to Manila); 5J215 (Cagayan de Oro to Davao); 5J216 (Davao to Cagayan de Oro); 5J391D (Manila to Cagayan de Oro); 5J392D (Cagayan de Oro to Manila); 5J397 (Manila to Cagayan de Oro); 5J398 (Cagayan de Oro to Manila) ;5J205 (Cebu to Cagayan de Oro); 5J206 (Cagayan de Oro to Cebu).
Tungod sa mga kanselasyon, pabilin ang gatusan ka mga pasahero nga anaa sa airport ug butyag sa pipila nga maghulat na lamang sila hangtod kanus-an mobalik ang normal nga flights.
Kagahapong adlawa, wala pa gihapon abiso ang mga airline company nga mobiyahe ang mga eroplano labina padayon nga nasinati ang dili maayong panahon. (SVB)