NANAWAGAN ang kapolisan nga magbinantayon ang mga hotel, inns, lodging house sa siyudad sa Cagayan de Oro human niadtong nilabay’ng adlaw usa ka inn ang gikawatan sa duha ka mga suspetsado nga unang nagpatuong kostumer sa dalan Gaabucayan, Agora, siyudad sa Cagayan de Oro.
Si Almar Micarzos, manager sa Luxurious Inn, ang igo na lamang sa pagpatala sa Police Station 3 (PS3) sa Agora human gikawatan ang ilang inn sa usa ka wala mailang suspetsado ug laing usa ka babaye nga maayo ang mga hitsura ug dili maalan nga kawatan, anaa sa 35 anyos paubos ang pangidaron ug maayo ang mga barog.
Saysay ni Micarzos nga unang nagpa-reserved og kwarto ang babaye nga gibayaran pa niini ang lawak nga 201 ug 202 nga anaa nahimutang sa 2nd floor nga bahin.
Pipila ka minute, mibalik kini sa reception ug miingon nga aduna pa siyay mga kauban nga paabuton.
Gibiyaan niini ang lawak nga nakabukas ug igo usab nga miabot ang kauban niining lalaki.
Nagpa-register kini sa pangalan nga Joel Reyes ug giokupa ang room 101 sa first floor.
Rason niini daw aduna siyay mga gamit nga lisod na isaka sa taas nga bahin.
Wala lamang gihatagan sa pagtagad sa mga empliyado tungod kay sakto man sab nga nagbayad ug nag-okupa ang duha.
Apan ang babaye nga kauban niini wala pa gihapon nakabalik ug misaka na ang nagpailang Morales paingon sa 2nd floor.
Diay unang gitabunan niini og masking tape ang Closed Circuit Television Camera (CCTV) usa gipanguha ang remote sa telebisiyon ug duha ka touch pad.
Migawas ang maong lalaki ug mikanaog. Wala gihapon gitagad sa mga empliyado sa pagtuong dunay paliton sa gawas.
Mibalik kini bitbit ang dako nga karton ug dihang gi-offer sa mga empliyado nga tabangan, miingon kini nga okey lang kay daw piano ang sulod niini apan diay karton lang diay nga walay sulod.
Dihang nakasulod na kini sa lawak sa room 201, gikuha niini ang 42 inches nga teleivision nga adunay kantidad nga P250 mil.
Ug gisulod sa karton nga unang gibitbit niini nga walay sulod.
Igo lang niining gilipat ang mga empleyado ug migawas sa inn ug wala na nakabalik.
Nadiskubre sa mga personahe nga ubay-ubay sa mga gamit ang nawala sulod sa lawak dihang pipila na ka oras nga wala na gyod mibalik ang miokupa.
Si Micarzos igo na lamang usab sa pagpa-blotter ug miingon nga tanan nga nakuha nga butang moabot og P280 mil.
Si Police Senior Inspector Ivan Viñas, kinsa hepe sa Police Station 3 (PS3) sa Agora, niingon nga nagkalain-laing modus ang gihimo sa mga kawatan ning panahona ug kinahanglan gyod magbinantayon ang tanan nga mga inn, lodging house ug hotel labina niadtong walay mga security guard.
Gihagyo usab niini ang mga inn nga kuhaon gyod ang identification card sa bisan kinsang mosulod ug susihon ang ilang mga dala alang sa seguridad kung kini moukopa sa lawak.
Ang kaso padayon pa nga giimbestigahan ning panahona labina ang pag-ila sa mga suspetsado.