GIHAROS sa mga kandidato sa Team Rama ang tanang posisyon sa Barangay Councilors League of the Philippines (BCLP) Cebu City chapter batok sa Bando Osmeña Pundok Kauswagan (BOPK) sa eleksyon niadtong Sabado sa gabii sa White Gold House.

Subling gipamatud-an sa pundok ni Mayor Michael Rama ang ilang pagkadominante human nidaog si Atty. Raymond Garcia, konsehal sa Barangay Kamputhaw batok kang Franklin Ong sa Kasambagan, 306-245, sa pagka presidente sa BCLP.

Gipukan usab ni Litoy Ceniza si Helen Francisco, 278-235, sa pagka executive vice-president sa BCLP.

Nagmalampuson usab silang Yody Sanchez ug Eugene Tabas sa Team Rama batok nilang Rex Milan ug Li­tang Abarquez sa BOPK sa pagka vice president sa BCLP sa north ug south district.

Si Grace Baquero ug Maria Pino nipildi nila ni Garry Lao ug Joan Babayson sa pagka secretary general ug treasurer.

Nidaog sa pagka auditor si David Agravante ug Gerry Auxillo pagka PRO sa BCLP batok nilang Raffy Briones ug Malou Tabar.

Samtang molingkod usab pagka board of directors silang Frank Gajudo, Troy Tan, Lino Bontilao ug Bradex Flores para sa north district ug Ann Palomo, Jojo Peralta, Richard Buscayno, Boy Ababon sa south district.

Niadtong 2010, ang grupo ni Ong nidagan nga walay mga kontra sa ilang tagsatagsa ka mga posisyon.

Kompleto ang attendance sa mga konsehal sa 80 ka mga barangay gawas sa usa nga namatay sa wala pa ang eleksyon.