GATOSAN ang natanggong sa mga terminal sa pier sa siyudad sa Sugbo ug lalawigan sukad sa miaging gabii.

Bisan walay bagyo, ang mga tagdumala sa barko ninghukom nga dili mobiyahe tungod sa kadagko sa balod.

Kadaghanan sa mga nakanselar nga biyahe labi na sa fastcraft ug gagmayng barko padulong sa Bohol, Leyte ug pipila ka bahin sa Mindanao nga duol sa low pressure area (LPA).

Human walay pagpugong sa Coast Guard, ang mga tagdumala sa barko mopabiyahe sa ilang sak­yanan kon molurang na ang dautang panahon.

Si Boy Artiaga, weather ob­server sa Philippine Atmosphe­ric, Geophysical and Astronomical Services Administration (Pagasa) Mactan, nibut­yag nga gamay ang posibilidad nga ma­himong bagyo ang LPA nga anaa dapit sa Surigao del Sur.

“Naa naman siya sa kayutaan, minos na ang posibilidad nga mahimong bagyo kay mobanggabangga man ni sa bukid. Kung naa pa sa dagat naay posibilidad mokusog kay makahigop og tubig,” pagpasabot niini sa pakighinabi sa Sun.Star Superbalita

kagahapon.

Si acting Cebu Coast Guard Station Comman­der Rodolfo Villajuan, ni­butyag nga labing mi­nos 15 ka nagkadaiyang klase sa sak­yanan sa kadagatan ang wa mamiyahe sugod sa buntag hangtod sa pagkutlo ning balita gumikan sa dagkong mga bawod nga gibanabanang moabot og 3 ka metros.

Matod niya, desisyon sa mga kompaniya ang pagkansilar og biyahe sanglit way gipakanaog nga storm signal ang Pagasa o mga lugar nga destinasyon sa barko.

“Due to big waves canceled 'yong mga trips. Iyong pag-stop ng trips discretion na 'yon ng company,” pagpasabot ni Villajuan sa Sun.Star Superbalita.

Gumikan sa kanseladong mga biyahe, gatosan ka mga pasahero ang natanggong sa mga pantalan sa Sugbo o namalik sa ilang pinuy-anan.

Ang Weesam Express Fastcraft ug mv Baraquel sa 2Go ang nisuway og biyahe paingon sa Leyte apan nibalik sa agi sa pier 3 tungod sa nasugatang dagkong mga bawod dapit sa Bohol.

Ang mv Beautiful Star nga giluwanan og 122 ka mga pasahero gikan sa pier 3 sa Cebu City pai­ngon sa Hilongos, Leyte, ang nikansilar sab sa biyahe.

Apil sa wa mamiyahe ang LCT Melrivic 2 ug 3 sa pan­talan sa Danao, Cebu paingon sa Isabel, Leyte; mv Super Shuttle Ferry 23 ug LCT 2 gikan Hagnaya paingon sa Sta. Fe; mv Island Roro 1, LCT San Juan Bautista ingon man ang Leonor 2, 3 ug 5 nga gikan sa Tangil, Dumanjug pai­ngon sa Basak, Negros Oriental ug uban pang sakyanan sa kadagatan.

Sa laing bahin, dili mominos 22 ka domestic flights gikan sa Manila ug Sugbo padulong sa Mindanao ug pipila ka bahin sa Central Visayas ang nakanselar sukad sa miaging adlaw tungod sa LPA.

Ang nag-unang airlines nga ningtaho sa pagkanselar Cebu Pacific Air, PAL Express, ug Zest Air.