KORALON sa Cebu City Government ang Warwick Barracks sa Carbon complex nga nasunog niadtong Sabado aron di makabalik og tukod sa ilang mga pinuy-anan ang mga residente.

Ang Prevention Restoration Order Beautification Enhancement (Probe) nisugod na sa paghawan sa lugar nasunogan.

Matod pa ni Raquel Bohol-Arce, pangulo sa Probe, nga 70 porsiyento na silang nahuman sa paglimpyo sa Warwick Barracks.

Giklaro sa hepe sa Probe nga bisan kon ilang kuralon ang dapit, hatagan gihapon nila og lugar ang mga nasunogan kansang mga stall giapil paglamoy sa kayo.

Gipadayag ni Arce nga gusto ni Mayor Michael Rama nga mopabarog og condominium unit sa lugar aron maoy puy-an sa mga urban poor apan wa pay pundo ang dakbayan sa Sugbo.

Base sa hulagway nga nadiskobrehan sa mayor, ang Warwick Barracks niadtong 1920 way mga balay o edepisyo hinungdan nga gusto ni Rama nga mabalik ngadto sa orihinal nga Warwick ang lugar.

Subay sa talaan sa Department of Social Welfare and Services, niabot ngadto sa 465 ka pamilya o 1933 ka individual ug niabot sa 237 ka mga balay ug tindahan ang nangaapektuhan sa sunog.

Ang mga bombero naglisod pagresponde sa lugar gumikan sa kahuot sa trapiko ug dali usab kaayong nakakaylap ang kayo resulta sa kakusog sa hangin hinungdan nga dali ra kaayong gilamoy ang mga stall ug mga balay nga gama sa light materials.

Ang DSWS nagsugod na sa paghikay sa mga dokumento aron mahatag ngadto sa kwalipikadong mga pamilya ang tag P10,000 isip livelihood assistance.

Apan di na hatagan ang mga apektadong pamilya og housing materials.

Ang Warwick Barracks kadaghan na masunog apan niadto lang Sabado nagrabihan ang maong dapit.