PITO ka adlaw na lang, ato na sab nga saulogon ang Adlaw sa mga Minatay o Kalag-kalag.
Gilauman nga sa sunod semana, hinay-hinay nang magdasok ang mga tawo sa nagkadaiyang mga sementeryo aron nga manglimpyo sa mga lubnganan sa minahal nila sa kinabuhi nga tua na sa laing kalibutan.
Mas mosamot pa gyud ang pagdasok sa mga tawo atol unya sa Adlaw sa Minatay sa Nobyembre 2.
Lauman nato ang pagtrapik sa mga lugar nga dunay mga mga sementeryo ning siyudad.
Gawas niini, panahon sab kini nga mosiaw ang mga dautang mga elemento aron nga makapahimulos sa higayon.
Hinuon, ang Davao City Police Office mipasalig nga andam na ang kapulisan nga bantayan ang atong mga kaigsuonan nga mangadto sa mga sementeryo.
Gawas sa dugang mga pulis, gipasalig sab sa DCPO nga nahan-ay na ang mga re-routing scheme sa mga sakyanan aron nga di maghuot ang kadalanan nga duol lang ang mga sementeryo.
Pinaagi niini, mas han-ay ug malinawon unya ang atong pagsaulog sa Kalag-kalag.
Apan ang paningkamot sa atong mga otoridad di magmalampuson kon kita mismong katawhan di makig-alayon ngadto kanila.
Busa, angay lang kitang magpakabana ug mosunod sa mga ilatid nga sumbanan sa mga otoridad diha sulod sa mga sementeryo kay alang man kini sa kaayohan sa tanan.