STA. CRUZ, Davao del Sur- Giunay og pusil sa usa ka lalaki ang kaugalingon sa dihang nahubog tungod sa gibating selos ngadto sa iyang kapuyo.
Ang insidente nahitabo alas 6:30 sa gabii niadtong Dominggo didto sa Sitio Cogon, Barangay Tuban sa lungsod.
Si Senior Insp. Grace Jamilla de Castro, hepe sa Sta. Cruz Police Station, nag-ila sa biktima nga mao si Archie Benemirito, 32, ulitawo ug molupyo sa nahisgutang lugar.
Nasayran sa imbestigasyon sa kapulisan nga nipauli ang biktima sa ilang balay gikan nag-inom sa bay ni Arnold Dean nga silingan ra sab niini.
Apan iyang naabtan ang kapuyo nga si Jocelyn Salica, 28, nga nakig-inom sab sa babayeng manghod sa biktima nga si Cecil.
Napungot si Archie sa pag-inom sa kapuyo busa iya kining gisinghagan og "layas".
Human sa insidente, mikuha ang biktima og pusil nga gitago ilawom sa higdaanan ug gitionan si Jocelyn.
Nakuyawan ang babaye ug misiyagit kini og "Ayaw Chie kay mobuto na!", suma sa kapulisan.
Nagkuyog pa ang magkapuyo sa pagsud sa ilang pinuy-anan apan paghidangat nila sa kusina nga bahin, kalit nga gition ni Archie ang iyang armas sa kaugalingong liog ug gipabuto kini hinundan sa iyang pagkalup-og.
Apan daling gitabang si Archie padung sa Davao del Sur Provincial Hospital (DDSPH) kinsa padayon karong giatiman gumikan sa talandugong kahimtang.
Nasayran sa kapulisan nga sa taknang mahubog ang biktima nagpunay na lang kini og selos sa iyang kapuyo ug makiglalis.
Gihuptan na sa kapulisan ang paltik nga kalibre nga .38 rebolber nga anaay human narekober sa nahitaboan sa krimen.
Mihimo pa og dugang pakisusi ang kapulisan aron nga maseguro nga way foul play sa nahitabo. (Orlando B. Dinoy)