DEAR Papa Joe,
Ako si Rusty, 30 years old, usa ka bayot. Ang akong suliran kabahin of course sa gugma.
Duna koy gihigugma nga lalaki sa una apan bisan usa sa akong pamilya wala masayud ani.
Wala man gani sila masayod nga bayot ko. Nakaplagan nako siya sa usa ka eskwelahan ug nagkarelasyon mi. Ako siyang gipatiwas pagpaeskwela. Hangtod nga nagkalagyo mi kay gipatawag siya sa iyang parents. Ako nga di pa ladlad, niuyon na lang para di mabulyaso. Lima na mi katuig nagkalagyo.
Sa dihang ni-graduate akong manghud nga babaye, nilarga siya og Manila ug nag-work.
Taudtaud na sad mi wala magkakita. Sa dihang usa ka adlaw, nitawag siya nila ni mama ug papa kay magminyo na siya ug manguli sila sa iyang pamanhunon. Pag-abot sa maong adlaw, nakuratan ko kay ang lalaki nga iyang banhunon ang akong uyab nga dugay nga wa mi magkita. Apan pareho mi, wala magpahata kay lisod na lagi mabuking. Gipasagdahan na lang sad mi nila nga magkasuod. Wala na sad malikayi nasaw-an na sad namo ang mainiton nga higayon.
Mao ni akong problema ron kay gusto na ko moladlad ug bawion nako ang laki kay sa ako siya nagagikan. Matud niya nga dako siyag utang kabubut-on mao nga okay niya nag magkakami bisan kasal na sila sa akong manghud. Unsay buhaton nako?
RUSTY
Rusty,
Di gyud na maayo ang imong nahuna-hunaan. Arang-arang unta og laing tawo na apan imong manghod na. Dili lang siya ang makontra nimo kon dili hasta pa imong mga ginikanan, kaparyentihan ug uban pa. Samot na nga karon pa ka moladlad.
Kon ingon ana nga klase sa lalaki ang mabana sa imong igsuon, maorag luoy sad ang kaugmaon sa imong manghod sa lalaki nga way baruganan nga nasayod man siya nga kaslunon siya.
Ibutang ta nga duna siyay utang kabubut-on apan you had your time. Nilabay na to ug karon unta proper closure. Dili hung-on nimo kay masamok ang sitwasyon. Makahatag gyud nag bati nga reputasyon nimo ug sa imong pamilya. Hunahunaa, Bro, sa makadaghan. Iampo na sa Ginuo para malamdagan ka sa saktong buhaton. Kana lang ug daghang salamat.
PAPA JOE
(sa inyong tampo ipadala lang sa papajoelon@hotmail.ph)