SA labing unang higayon, maka-produce na unya og kuryente ang Sugbo pinaagi sa hangin gamit ang mga windmill nga pabarugon sud sa halos 20,000 ka ektarya nga luna sa Sudlon II, dakbayan sa Sugbo, siyudad sa Toledo ug lungsod sa Balamban.

Si Joaquin Jack Rodriguez Sr., chairman sa Amihan Energy Corp., niingon nga gipili nila ang Sugbo alang sa proyekto tungod sa geological formation niini.

Siya nibutyag nga base sa ilang pag-testing sa hangin sa nagkadaiyang mga dapit sa Pilipinas, ang Sugbo ang makahatag og 18 oras nga wind power sa usa ka adlaw samtang 10 ka oras sa ubang lugar, base sa nasukod sa ilang gimontar nga wind meters.

Si Rufino Bariñan, chairman ug chief executive officer sa Amihan, nibutyag nga matag windmill maka-produce og 2 ngadto sa 2.5 megawatts nga pabarugon nila sud sa 2-3 ka buwan.

Kini ang labing unang higayon maggamit og renewable energy sa Kabisay-an pinaagi sa windmill.

Atol sa press conference sa Kapitolyo kagahapon, si Rodriguez ni­­banabana nga magkantidad og $190-$200 milyones alang sa pasiunang 60 MW ug magkadako pa kini

sanglit tinguha nila nga 200 MW ang ma-produce nga kuryente sa maong wind farm.

Karong Disyembre, ma­tod ni Rodriguez, magsugod na kini og operate.

Sa gitas-on nga 80 metros o 220 ka tiil ibabaw sa yuta, makakuha og hangin ang windmill alang sa 18 ka oras nga wind power samtang ang nahibilin nga 6 ka oras, maggamit sila og solar energy.

Si Rodriguez uban sa pipila ka mga opisyal sa Amihan Energy Corp., ang nibisita ni Gobernador Hilario Davide III sa Kapitolyo kagahapon.

Ang gobernador ni­in­durso sa proyekto samtang sumala ni Rodriguez, nasayod na si Presidente Benigno Aquino III labot sa proyekto.

Si Rodriguez niangkon nga mahal ang kuryente gikan sa maong klase sa teknolohiya apan samtang magkalambo ang teknolohiya, magkabarato unya kini.

“I want you all to imagine, when Cebu can look at the rest of the world and say, we don’t need your oil. We have our own energy and that’s clean,” nagkanayon kini ngadto sa mga tigbalita.

Sud na sa 7 ka tuig, nga ania dinhi sa Sugbo ang grupo alang sa testing ug pag-obserbar sa hangin sa isla.

Ang maong proyekto, dugang ni Rodriguez, maghatag og daghang benepisyo sa mga Sugbuanon gumikan sa ilang ibayad nga buhis sa kagamhanan, maghatag og mga trabaho, magpalambo sa turismo ug patigayon sa nahisgutang mga dapit.

“It could also be an attraction where you can bring your family and friends and children within the day and watch the windmills,” sumala niini.

Siya nidugang, ang proyekto makatabang usab sa kabataan nga makakat-on sa renewable energy gamit ang windmill.

Si Rodriguez namahayag nga aduna na sila’y kontrata sa nasodnong kagamhanan alang sa production sa hangin sa probinsya.

Ang Amihan Energy Corp., gilangkoban sa Visayan Wind Energy Holdings, Mudajaya Berhad sa Malaysia ug Dongturbo Electric Co. Ltd sa China.