SIRHAN ang duha dagkung mga terminal sa siyudad sa Sugbo alang sa mga sakyanan sa habagatang bahin atol sa prosesyon ug Sinulog grand parade.
Ang pangsirhan mao ang Cebu South Bus Terminal ug One City Link.
Ang mga bus, mini bus ug v-hire nga gikan sa habagatang Sugbo adto na moparada sa ilang mga sakyanan sa gitudlo nga temporary terminal sa South Road Properties (SRP), sa daku nga dalan paingon sa Gasoline depot sa City Hall ug duol sa Big Foot paingon sa Pond A.
Ang mga depasahero-an nga bus, mini bus ug V-hire nga gikan sa south mahimo pang makasulod sayo sa buntag sa Sabado, apan sa pagka alas 10 sa buntag sa samang adlaw sugdan na sa pagsirado sa Cebu City Traffic Operations and Management (Citom) ang mga dalan nga agianan sa prosesyon.
Ang prosesyon anha magsubay sa dalan Panganiban, gikan sa Magallanes nga mosubay paingon sa Borromeo st., molapos sa dalan Sanciangko ug moliko sa dalan Panganiban, mogawas sa N. Bacalso avenue, moliko sa V. Rama avenue hangtud na sa eskina B. Rodriguez, mosubay paingon sa Vicente Sotto Medical Center ug molahos sa Fuente Rotunda ug mosubay sa Osmena boulevard balik sa simbahan sa Basilica.
Tungod sa maong rota di na maka-agi pa ang mga sakyanan ug mga de pasaheroan nga mosulod sa One City Link Terminal ug Cebu South Bus Terminal.
Si Direktor Ahmed Cuizon sa Land Transportation Franchising and Regulatory Board (LTFRB) mohatag og special permit sa mga PUJ nga moserbisyo sulod sa SRP diin matag pasahero moplite og P7.
Maablihan ug balik ang mga terminal human sa prosesyon, apan sirhan pagbalik atol sa clearing operation nga himuon sa Citom sa alas 10 sa gabii sa Sabado.