LUWAS na gikan sa makuyaw nga kahimtang si Compostela, Cebu Vice Mayor Josephine Abing human siya nadasmagan ug naligsan niadtong Dominggo sa alas 7 sa gabii sa national highway sa Barangay Cotcot, Liloan, Sugbo.

Si P03 Rutchel Jugalbot, traffic investigator sa Liloan Police nga nahinabi sa dySS Super Radyo ug Sun.Star Superbalita nagkanayon nga si Abing na-confined sa Chong Hua Hospital dinhi sa dakbayan sa Sugbo tungod sa samad sa agtang, ulo ug ubang parte sa kalawasan.

Siya niingon nga si Rogelio Binabaye Jr., 34, minyo tag-iyag parlor, taga Barangay Cotcot nga nagmaneho sa iyang multicab (JDV 550) maoy nakadasmag sa opisyal.

Si Jugalbot niingon nga si Abing gikan sa usa ka parlor sa Barangay Cotcot ug nilabang sa karsada aron mopauli sa Barangay Cogon, Compostela.

Wa siya makabantay sa multicab nga gimaniho ni Binabaye hinungdan nga siya nadasmagan.

“Nabuak ang windshield sa multicab. Natumba si Bise Mayor. Nabangil pa daw iyang abaga. Maayo na lang gani kay dili kaayo kusog ang dagan,” dugang ni Jugalbot.