HUMAN masunog ang Warwick Barracks sa Barangay Ermita dakbayan sa Sugbo, ang konseho nipaubos na sa lugar ilawom sa state of calamity atol sa regular session kagahapon.

Si Konsehal Gerry Carillo, chairman sa committee on social services sa konseho, maoy niduso og resolution aron sa pormal nga pagdeklara sa lu­­gar nasunogan aron ang barangay ug City Hall ma­kapagawas og pundo para sa mga apektado sa sunog.

Ang Prevention Restoration Order Beautification Enhancement (Probe) nipahigayon na og clearing operation sa Warwick nga sakop sa Carbon Market sa Ermita uban sa Unit-I, Unit-I, Unit-III ug Freedom Park.

Matod pa ni Market Administrator Raquel Bohol-Arce kinsa mao sab ang hepe sa Probe nga inig human unya nila og clearing sa dapit, ila kining kuralon subay sa direktiba ni Mayor Michael Rama aron mapugngan ang mga residente sa pagtukod og balik sa ilang tindahan o balay.

Si Rama nipakita sa mga tigbalita sa orihinal nga hulagway sa Warwick Barracks niadtong 1920’s nga usa ka parke kaniadto ug way edepisyo nga nagbarog apan gihimo na kining residential area niadtong wala pa masunog.

Ang mayor kinsa mahigugmaon sa mga plaza ug naila sa pagpanindot sa mga dapit sa dakbayan gusto nga mahibalik sa iyang orihinal nga porma ang Warwick Barrack kansang lugar gipanag-iya sa gobiyerno.

Di mominos 2,000 ka mga tawo ang unang naapektahan sa sunog apan sa pagpanglista na sa Department of Social Welfare and Service niabot na kini sa dul-an 4,000 hinungdan nga temporaryo unang gipahunong ni Rama sa nakalabay nga adlaw sanglit ang mayor nagtuo nga di na tinuod ang maong numero.

Ang DSWS mohimo og estriktong pakisusi aron dili sila malutsan sa mga gustong magpahimos sa higayon.