DI NA maglibog ang mga sumasakay kon asa sila makasay ka yang traffic enforcers ug parking aide sa Cebu City Traffic Operations and Management (CITOM) ipakatap sa kadalanan atol sa prosesyon ug Sinulog grand parade aron mogiya kanila.

Ang mga enforcer ug parking aide gipaubos sa seminar sa re-routing plan.

Sila magdala usab og kopya sa re-routing sa mga sakyanan atol sa ilang pag-duty sa Sabado ug Dominggo.

Matod sa usa ka opisyal sa Citom nga pinaagi niini di na masaag ug di na magpaso-paso sa dalan ang mga sumasakay kay makatoltol na man asa moagi aron makasakay pinaagi sa paggiya sa mga taga CITOM.

Samtang mga supervisor ug mga inspector nituyok usab sa mga sibyaanan sa radio sa

Sugbo aron pagpahibawo sa re-routing sukad sa milabayng semana.

Ikaduha na kini nga tuig nga ang Citom mihimo og information drive pinaagi sa pagpa interview sa radio ug nagpahibawo sa kausaban sa rota sa mga sakyanan nga de pasahero-an.

Nigamit usab og social media ang Citom pinaagi sa pag post sa Facebook sa traffic re-routing sa kapistahan sa Senor Santo Nino.

Makita kini sa official homepage sa Citom sa Facebook.

Miawhag usab ang Citom sa publiko nga nakaabli sa Facebook nga ipakatap ang impormasyon sa ilang mga kaila dinhi sa Sugbo, tibuok nasud ug abroad.

Gatusan usab ka sakop sa Citom ang gipabakunahan og anti-flu vaccine isip pagpangandam sa Sinulog ug panagang sa mga sakit nga posibling motakboy sa mga sakop.