SA ikatulong sunodsunod nga higayon, nahagsa na usab ang defending champion Miami Heat sa nagpadayon nga regular games sa NBA 2014 season.

Ning higayona, ang Washington Wizards nga gipangulohan ni John Wall nga may 25 puntos maoy mibuntog sa Heat, 114-97. Ang Miami miduwa nga wala gihapon ang ilang pointguard nga si Mario Chalmers. 

Ang Wizards komportable nga nakakulit og 34 puntos nga labaw apan daw nahulga kini sa dihang napaus-os sa Heat ngadto sa single digit ang ilang bintaha.

Sila si Bradley Beal ug Nene pulos nakatampo usab og tag 19 puntos samtang sa pildirong Heat si Chris Bosh mitali og 26 ug 25 usab ang napakli ni LeBron James gawas sa iyang walo ka rebounds, pito ka assists ug upat ka turnovers.

Si Gregg Oden kinsa taodtaod na gyud nga wa ma­kapakita og aksyon, gipaduwa kagahapon ni Heat coach Eric Spoelstra, nga maoy naghatag og timaan sa iyang kompletong pagbalik. 

Si Oden kinsa permi lang makaangkon og injury sa iyang tuhod sukad sa iyang pagsugod sa NBA, katapusang nakaduwa niadtong Disyembre 5, 2009 diin ubos pa siya sa Portland Trail Blazers batok sa Houston Rockets. Siya adunay 6 puntos sulod sa nuebe minutos.

Ang Heat nga padayon nga namugnaw sukad niadtong Biyernes, sa ikaduhang higayon, mibista na usab sa White House aron pasidunggan ni Presidente Barack Obama tungod sa ilang ikaduhang sunodsunod nga kampiyonato.

Sa first half, daw sa gipakita sa Wizards nga ang Miami dii na mamahimong imbitahon pa sa White House sunod tuig pinaagi sa pagpabuto niini og 20-0 nga rally.

Nasul-ob sa no. 20 nga jersey, si Oden misulod sa korte sa 6:30 nga nahabiling sa first half. Nakahimo dayon siya og offensive rebound, nakahansak ug naka-foul sulod sa unang 30 seconds niya sa korte.

Kini maoy unang higayon nga ang Heat nakaangkon og tulo ka sunodsunod nga kapildihan sukad niadtong 2012 Eastern Conference finals batok sa Boston Celtics.

Sa laing duwa, mikulit og 26 puntos si Joakim Noah ug midugang og 23 si Carlos Boozer aron ihatod ang Chicago Bulls ngadto sa kulbahinam nga kadaugan, 128-125, sa duwa nga niagi pa og tulo ka overtime batok sa Orlando Magic.

Ang Bulls midaog na og kapito sa korte sa Orlando ug mipausbaw sa ilang record, 4-1 sukad ilang nabaylo si Luol Deng.

Ang Magic mipataas sa ilang way putolputol nga ka­pildihan ngadto sa siyam ka duwa.

Sa uban pang resulta, ang San Antonio Spurs nakaipsot sa Utah Jazz, 109-105, samtang midaog usab ang Houston Rockets batok sa New Orleans Pelicans, 103-100.

Mipabuto og tres si Thaddeus Young aron ihatod ang Philadelphia 76ers ngadto sa 95-92 nga kadaugan batok sa Charlotte Bobcats.

Gipatugbabawan sa Boston Celtics ang Toronto Raptors, 88-83, ug nakaipsot ang Sacramento Kings sa Minnesota Timberwolves, 111-108.

Ang Suns mipauga sa Los Angeles Lakers, 121-114, gipukling sa Portland ang Cleveland Cavaliers, 108-96, midaog ang Denver Nuggets batok sa Golden State, 123-116, ug gipatapsingan sa LA Clippers ang Dallas Mavericks, 129-127.