MOKABAT sa 56 porsen­to sa mga magpapatigayon niingon nga nakakita silag daghang pangurakot sa gobyerno, sumala sa ulahing survey sa Social Weather Stations (SWS).

Nagpakita ang maong survey og umento nga 30 porsento gikan sa 43 por­sento sa tuig 2012.

Nisaka ang pangurakot o nakita lang nila ang daghang mga buaya sa gobyerno?

Di ba nawagtang na man ang pork barrel nga gitawag og Priority Development Assistance Fund (PDAF) nga gideklarar nga unconstitutional sa Korte Suprema? Nawagtang na bitaw pero gi-realign man lang sa mga senador ang ilang binilyon ka pesos nga pork barrel.

***

Ang maong face-to-face survey nga gihimo gikan sa Hulyo 31 ngadto sa Nobyembre 21 sa miaging tuig sa mga executives sa 951 ka mga kompaniya sa tibuok nasud nagpakita usab nga natagbaw sila sa paningkamot sa gobyerno nga palambuon ang mga negusyo.

Ang ilang gitubag sa maong survey matod pa ilang personal knowledge sa pangurakot.

Sila gyud mismo ang nakasaksi niini.

Mao sab tingali nga nisaka ang perception sa pangurakot sa gobyerno kay nahibaw-an na man ang mga pangurakot sama sa P10-billion pork barrel scam nga gihilom lang kaniadto.

***

Sa 26 ka mga ahnesya sa gobyerno nga gigradohan sa kamatinud-anon sa pagwagtang sa pangurakot, ang Bureau of Customs nakakuha sa grado nga “very bad” nga net sincerity rating nga negative 63 gikan sa bad rating nga negative 46.

Ang Senado nitidlom gikan sa positive 36 sa tuig 2012 ngadto sa negative 8 sa 2013.

Ang tuig 2012 mao ang tuig nga gikonbikto sa Senado si kanhi Justice Renato Corona human sa impeachment trial. Wa pa kahibawo ang mga tawo nga gigantihan diay ang mga senador og gikan sa P50 milyunes ngadto sa P100 milyunes human makonbikto si Corona.

***

Ang House of Representatives nitidlom gikan sa negative 6 ngadto sa negative 28, ang Department of Education gikan sa positive 51 ngadto sa positive 49, ang Department of the Interior and Local Government gikan sa positive 30 ngadto sa positive 20, ang Department of Budget and Management gikan sa positive 23 ngadto sa positive 9, ang Land Transportation Office gikan sa negative 26 ngadto sa negative 32, ang Office of the Ombudsman gikan sa positive 39 ngadto sa positive 23 ug ang mga hukmanan gikan sa positive 11 ngadto sa positive 9.

Apan nisaka ang rating sa Korte Suprema gikan sa positive 24 ngadto sa positive 36, ang

Commission on Elections gikan sa negative 13 ngadto sa positive 7, ang Department of Justice gikan sa negative 5 ngadto sa positive 35 ug ang Commission on Audit gikan sa positive 8 ngadto sa positive 22.