MAGKONTRA ang defending champion Ford Academy of the Arts ug Assumption College of Davao alas 8 sa buntag sa The Royal Mandaya Hotel (TRMH) Cup ugmang adlawa didto sa Davao City Recreation Center, kanhi Almendras Gym.

Gipahayag ni Tournament manager Jek-Jek Melendres sa Davao Sportswriters Association (DSA) Forum sa NCCC Mall B3 Center niadtong Huwebes nga nindot tan-awon ang ilang panagkontra diin pulos kini nanguna sa cadet dibisyon.

Ang laing pagkontra sa semifinals mao ang Holy Child College of Davao (HCCD) batok Philippine Women's College (PWC) sa mini division, alas 10 sa buntag, Ateneo de Davao University batok Precious International School of Davao (PISD) sa mini alas 11:30 a.m., HCCD kontra Ford sa cadet, alas 1:30 sa hapon, AdDU batok HCCD sa mini ug PWC kontra PISD, alas 4:30 p.m.

Dugang ni Melendres nga nabag-o ang sistema sa semis round diin mahimo na kini nga single elimination sa parehong dibisyon ug ang duha ka tim manguna maoy moabante sa kampeyonato sa torneyo nga gitugotan sa Samahang Basketbol ng Pilipinas (SBP) ug gipresenta sa TRMH president Glenn Escandor.

Ang premyo ihatag sa mga modaug nagbalor og P5,000, P3,000, P2,000 ug P1,000 sa matag kategorya. (Marizz S. Robilla)