COTABATO CITY - Tulo ang patay sa pagpamanhig alas 8:40 sa buntag niadtong Huwebes.

Giila ang namatay nga mao sila Johander Marunting, Guiyanid Ali Adta ug Kadir Ali Adta, mga molupyo sa Barangay Simuay, Sultan Kudarat, Maguindanao.

Gibutyag ni Cotabato City Police Director Senior Superintendent Rolen Balguin nga samtang sakay ang mga biktima sa duha ka motorsiklo nga naghatud sa ilang baligyang sala set sa Barangay Tamontaka 1, Cotabato City, giatangan sila sa wala mailhing mga armadong lalaki dayon gipamusil sila gamit ang .45 kalibre nga pistola ug M16 Armalite rifles.

Abtik nga misibat ang mga suspetsado dala ang duha ka motor sa mga biktima ug kuwarta nga nagkantidad og P70-mil.

Gisapupo ang mga biktima sa mga sibilyan ug nagrespondeng mga pulis sa Cotabato Regional and Medical Center (CRMC) apan gideklara sila sa mga attending physicians nga dead on arrival.

Nakaangkon og daghanng samad pinusilan ang mga biktima sa nagkadaiyang parte sa kalawasan nga maoy hinungdan sa ilang kamatayon.

Walay mga molupyo sa maong dapit nga motestigo bisan nakaila sila sa mga namusil sa kahadlok nga patyon sab sila sa mamumuno.

Pagpanulis ug rido ang gilantaw sa kapulisan nga motibo sa pagpatay sa mga biktima nga padayon nilang gi-imbestigahan. (Edgar Fuerzas)