NAGHATAG og kahasol sa pipila ka mga pasahero ang kanunay nga makanselar nga flights ning padayon ang Low Pressure Area (LPA) nga nasinati.

Kagahapon sa buntag, unom na ka mga flight ang gikanselar tungod sa walay puas nga pag-ulan ug grabeng kabaga sa panganod diha sa Laguindingan Airport, Laguindingan, Misamis Oriental.

Usa ka pasahero nga mao si Jeremy Quaichon, taga Camaman-an ning siyudad ang niingon nga katulo na siya nagsige og balik-balik sa airport tungod kay niadto pa untang adlaw’ng Lunes iyang biyahe paingon sa Cebu.

Tungod kay kanselado ug gi-set sa sunod nga adlaw mibalik na usab siya sa airport apan nakanselar na usab. Kini ang ikatulong higayon nga kanselado na ang iyang biyahe.

Matud niini nga dili gyod matayming sa ubang flights nga nakalarga labina adunay kalit lang mohawag ang panahon.

Dismayado man kini sa kanunay nga kanselado nga biyahe apan gipasalamatan na lamang niini nga gikanselar kaysa mopadayon ug larga unya aduna hinuon dautan nga mahitabo.

Kahinumduman una na gibutyag ni Engineer Jose Budiongan, Laguindingan Airport manager, nga ilang gikanselar ang flights tungod kay ang airport dili kumpleto og navigational aids.

Dugang ni Budiongan nga dili kini makagarantiya sa mga eroplano nga molanding labina sa dautan nga panahon nga nasinati susama ning panahona.(SVB)