DUHA ka lumad nga taga Leyte, ang usa sa mga dapit nga gikusokuso sa super typhoon Yolanda, ang nangulo sa laing top four sa ikaduhang adlaw sa elimination round sa nagpadayon nga Sinulog 10-Ball Handicapping tournament diha sa Jancor Billiards Recreation sa Manalili st., dakbayan sa Sugbo.
Si Antonio Delfin, sa probinsiha sa Leyte ang yaning mikusokuso ni Dodong Didal sa dakbayan sa Davao, 6-2, aron makasiguro og luna sa knockout stage sa lima ka adlaw nga torneyo.
Gawas kang Delfin nakapugnit usab og luna sa knockout stage si Bernardo Resuena Jr. nga taga Inopacan, Leyte human sa iyang yanong kadaugan batok sa Sugboanong si Eljohn Abellana, 6-3.
Kulbahinam nga kadaugan ang naangkon usab ni Renemar David sa Manila human kini mibuntog ni Bonnie Camel sa Bohol, 6-5. samtang si Marvic Gentapa sa Tabunok, Talisay City maoy bugtong Sugboanan nga ni-qualify sa ikaduhang adlaw sa elimination round pinaagi sa pagpukan ni Keith Manayon sa Talisay, 6-5.
Hangtod ning pagsulat, padayon pa ang mga duwa sa ikatulo ug ikaupat nga adlaw sa elimination round. Karong gabii ipahigayon ang championship round diin ang kampyon makabulsa og P50,000 og tropeyo samtang ang runner-up adunay P20,000.
Ang kompetisyon gidalit sa Jancor Promotions.