SA EDAD nga 82, mipanaw sa laing kalibutan si World Boxing Council (WBC) president Don Jose Sulaiman.
Si Sulaiman mipaubos sa major heart surgery sa UCLA Medical Center niadtong Oktubre.
Ang iyang anak nga si WBC executive secretary Mauricio Sulaiman misaysay nga maisugong gisagubang ni Sulaiman ang iyang sakit.
Apan sa ngadto-ngadto, wala na nakaantos si Sulaiman ug mipanaw kini tungod sa mga komplikasyon sa iyang sakit.
Daghan kaayong mga lagda ang gihimo ni Sulaiman ug usa sa mga importante kaayo mao ang pag-us-os sa title fight gikan sa 15 ka rounds ngadto sa 12 aron ilikay ang mga boksidor sa makuyaw nga sitwasyon.
Si Sulaiman napiling presidente sa WBC niadtong 1975 isip hulip sa Pinoyng si anhing Justiniano Montano Jr, kanhi chairman sa Games and Amusements Board.
Ang mga lagda nga gipatuman sa WBC gimugna sa laing Pinoy nga si Rudy Salud, ang labing unang secretary general sa WBC.
Katapusang mibisita si Sulaiman sa Pilipinas niadtong 2007 sa malampusong WBC Annual
Convention nga gi-host ni kanhi GAB chairman Eric Buhain.