DAGHANG reunions ug salo-salo karong Sinulog ug ni-adtong Pasko ug Bag-ong Tuig.

Kasagarang hisgutan sa mga kanhing classmates, kaila ug paryente ang estado (minyo na ba o single pa), bag-ong apilyedo, gidaghanon sa anak, trabaho diri ug gawas sa nasud ug mga kataw-anan nga lumba-estorya sa gidak-on sa bilbil, tiyan ug kunot sa agtang.

Dunay nangutana nganong hangtod karon wala silay nakitang uban sa akong buhok. Ako’ng gikomedyahan pagtu­bag “ako gipang-ibot una ko mitunga sa reunion.” Mibahakhak og katawa akong mga ka kukabildo nga mga kanhing classmates ug magtutudlo.

Daghang rason nganong dali matiguwang ang tawo: Una, kining gitawag og stress nga usahay mo resulta sa kalit nga pagkawala sa gana sa pagkaon, grabeng kahago ug pangapoy sa kalawasan, pagka-upaw o pahak sa buhok, kuwang sa tulog ug pahuway.

Ang uban sayo moputi ug modaghan ang uban og kunot sa panit labi na adtong kanunay ma-initan sa ilang trabaho ug magsige og kaon og pinalit o luto-daan (pungko-pungko, karenderya, restaurant, drive through ug fastfoods) nga dunay daghang sagol nga preservatives, tambok ug mga kemikal nga makadaot sa lawas.

Kasagaran, kining mga pagkaong pinalit nga luto-daan dunay mga sagol nga mga preservatives ug kemikal sama sa sodium, saturated fat, cholestrerol gituyo para dili madali og kadaot ug pan-os ang pagkaon nga baligya. Ang uban giluto sa daghang mantika sa baboy nga gibalikbalikan na paggamit. Ang uban sab sinagulan og daghang tambok sa baboy o harina para modako ug modaghan tan-awon ug lain-laing sarsa ug kamay para pampagana ug palami nga mao’y kasagarang hinungdan sa pagta-as sa pressure sa dugo, sugar o asin sa lawas nga nakaingong sa mga sakit-sakit sa kidney, kasing-kasing, tiyan, atay, mata ug uban pa. Dili sekreto ang yawe sa pabata. Kung ikaw pa-ingon na sa katiguwangon, angay’ng magmatgon sa pagkaon aron mataas-taasan ug malugwayan pa ang kinabuhi.

Para kini makab-ot, sa sayo pa sugdan na og disiplina ang kaugalingon sa pagpuyo og healthy lifestyle sama sa pagkaon og daghang prutas, utanon ug lagotmon batok sa cancer : kamatis, avocado, kapayas, mani, uhong, okra, ahos, broccoli, kangkong, alugbati, carrots, kamungay ug uban pa nga kolor berde ug pula nga pagkaon inay mga pastries, cookies o cakes. Gawas nga barato, daghan ug matanum ra kini sa palibot.Daghana pagkaon sa pamahaw, insaktong gidag­hanon sa pani-udto ug gamay na lang sa panihapon aron mahilisan.

Mag-ehersisyo (dagan, sayaw, lakaw) mga 30 mi­nutos kada adlaw para makahanggap og presko’ng hangin. Ginhawa og lawom ug ipaguwa ang hugaw nga hangin sulod sa lawas. Kini makatabang sab pagpakalma sa kaugalinhon, pagtaas sa resistensya ug panindot sa porma sa lawas.

Batasana ang pag inum ug daghang tubig ug juice (mga 2 ngadto sa 3 ka litro matag adlaw) kay makatabang kini pagtangtang sa mga toxins (hugaw). Importante sab ang insaktong pagpahuway (matulog og 7 ngadto sa 8 ka oras kada adlaw) ug likayan ang panigariyo og pag-inum sa makahubog nga mga ilimnon.