SUKAD giimplementar ang Executive Order 39 sa lokal nga gobyerno sa atong dakbayan sa Davao miubos ang mga aksidente sa atong mga kadalanan kun traffic accident ang hisgutan.

Sa wala pa ang lokal executive order, hilabihan ka daghan ang mga namatay gumikan sa mga abusador nga mga driver. Sumala ni Traffic Management Center (TMC) head Police Supt. Rhodelio Poliquit, 20 porsiyento ang nabawas sa mga aksidente sa kadalanan.

Dapat lang tungod kay matag aksidente nga mahitabo tagsa ray mga drayber nga mamatay, kadaghanan ilang mga pasahero, o dili kaha ang mga motabukay sa atong kadalanan.

Pero ang nakapakurat sa milabay nga semana mao ang pagkasikop sa atong kanhi Mayor sa Davao Inday Sara Duterte-Carpio nga nakalapas sa speed limit nga gipatuman sa Executive Order 39. Nangurog intawon ug gipaningot og bugnaw ang traffic aid tungod kay wala siya magdahum nga si Inday Sara ang iyang nadakpan.

Abogada ang atong kanhi mayor, nagpa-isyu dayon siya og temporary operator’s permit (TOP), ug gilukat ang iyang lisensiya didto sa Land Transportaion Office (LTO) ug mibayad sa angay bayaran.

Kining mosunod mao ang nakalagda sa Republic Act 4136 nga gi-aprubahan niadtong Hunyo 20, 1964 ug maoy gibasehan ni Mayor Rody Duterte sa iyang Executive Order 39.

Sa Section 35, Article 1, Chapter IV ang traffic rules maximum allowable speed limit, passenger car, and motorcycle:

1. On open country roads with no “blinds corner” not closely bordered habitation 80 Km per hour.

2. On “through streets” or boulevard clear or traffic with no “blinds corner” when so designated 40 Km per hour.

3. On City and municipal street with light traffic when not designated “through street” 30 Km per hour.

4. Through crowded street approaching intersection at “blinds corner” passenger, school zone, passing other vehicle which are stationary or for semilar dengerous cercumstances 20 Km per hour.

Sa maong balaod, walay labot ang usa ka driver nga Doctor nga miresponde og usa ka emergency call. Ang driver sa ambulansiya nga naghatud og masakiton sa hospital. Ang driver nga may dala nga samaron paingon sa hospital. Ang driver nga gisakyan og otoridad nga may gigukod nga kriminal. Ang traffic enforcer nga may gigukod nga traffic violator, ug sakyanan sa Armadong Kusog sa Pilipinas nga miresponde og riot, ug uban pang matang sa sala nga rebelyon. Kini ang exempted sa akta republika 4136 sa section 35.

Ang Executive Order 39 gikutlo sa RA 4136 maoy hinungdan nga wala na mo-contest pa ang atong kanhi mayor tungod kay abogada siya ug nasuhito sa balaod. Walay 60 Kph nga nakabutang sa balaod, ug ang gikusgon sa pagpadagan ni Inday Sara sa iyang sakyanan, 57 kph sa dihang nasakpan sa speed gun sa traffic aid.

Ang dugang panig-ingnan sa maong hitabo nga walay gipili ang balaod kay bisan og Duterte, basta nakalapas sa balaod, kinahanglan dakpon ug manubag sa sala nga nahimo. Matud pa sa karaan nga panultihon, “No one is above the law”, walay palakasan - walang kamag-anak. Alang sa usa traffic aid, keep up the good work.

Alang sa inyong dugang komento, pag-email lang sa algenoguin@yahoo.com o superbalitadavao@yahoo.com.