PITO ka mga probinsiya sa Mindanao ang gibutang sa storm warning signal number 1, samtang ang Tropical Depression “Agaton” nagmintinar sa iyang gikusgon ug nagpadayon sa paglihuk paingon sa kasadpang bahin, nga gilauman nga mag-landfall sa Davao Oriental sud sa 36 hangtud 48 hours gikan sa pagsuwat alas 5 kagahapon sa hapon, Dominggo.
Ang Philippines Atmospheric, Geophysical and Astronomical Services Administration (Pagasa) nagbutang sa Surigao del Sur, Agusan del Sur, Davao Oriental, Davao del Norte, Davao del Sur, Davao City, ug Compostela Valley ilawom sa storm signal number 1 dihang anaa sa 30-60 kilometros matag oras ang gikusgon sa hangin.
Suma sa Pagasa, ang dagan sa hangin di matagna sanglit anaa ang northeast monsoon kun hanging amihan ug high pressure areas (HPA) sa kadagatan sa Pasipiko.
Ang Tropical Depression Agaton unang gilauman nga molihok sa kasadpan ug motugpa sa Surigao City apan ang duha ka high pressure areas nga miporma sa northeast monsoon nakapasibog niini sa habagatang sidlakang bahin sa Mindanao.
Apan si Agaton miadto sa laing direksyon paingon sa habagatang kasadpan sa Davao Oriental, suma sa taho sa Pagasa.
Alas 11 sa buntag, Dominggo, si Agaton anaa sa 205 kilometros sa habagatang sidlakan sa Hinatuan sa Surigao del Sur o anaa sa 230 kilometros sa sidlakang bahin sa siyudad sa Davao.
Ang iyang gikusgon sa hangin anaa sa 55 kilometros matag oras duol sa sentro.
Tungod niini, ang Office of Civil Defense (OCD) nag-abiso sa tanang disaster risk reduction and management council nga mag-alerto sa ilang mga lugar.
Si Eastern Mindanao Command (Eastmincom) Public Information Office head Capt. Alberto Caber, sa laing bahin, nagtaho nga 8,513 ka pamilya sa Eastern Mindanao, ang gipabakwit sa luwas nga lugar.
Suma niya nga dunay 53 ka munisipyo ug 257 ka barangay ang apektado sa kusog nga hangin dala sa Tropical Depression “Agaton”.
Sa 53 ka munisipyo, lima anaa sa Surigao del Sur; napulo sa Surigao del Norte; tulo sa Dinagat Island; unom sa Agusan del Sur; upat sa Davao del Norte; siyam sa Compostela Valley; upat sa Davao del Norte; ug 12 sa Davao Oriental.
Gikataho nga ang kalsada sa Barangay Nurcha sa lungsod sa Lanosa sa Surigao del Sur di maagian tungod sa baha ug landslide tungod sa padayong pag-uwan sa probinsya.
Dugang niya nga misaka sab ang tubig sa Barangay Inawayan ug Barangay Astorga sa Sta. Cruz, Davao del Sur.
Suma sa report nga nakalap ni Caber, 29 ang namatay, 28 ang naangol, ug pito ang na-missing sa Eastern Mindanao.
Mikabat sab sa 577 ka balay ang gikatahong naguba.
Sa laing pakighinabi, si OCD regional director Loreto Rirao nagkanayon nga misaka na sa 52,807 ka pamilya o 249,888 indibiduwal ang nagkinahanglan og kapuy-an.
Suma ni Rirao nga 21 ka tawo ang namatay, 64 naangol ug upat ang nahanaw sa Davao Region. (Alger P. Dura ug Ivy C. Tejano)