UPAT ka mga balay ang apektado sa landslide niadtong Sabado sa buntag sa Barangay Sayawan, lungsod sa Impsug-ong, Bukidnon.

Kini ang gikumpirma ni Sayawan Kapitan Orle Sumante ug miingon nga hinuon walay naangol ug nasamadan sa landslide tungod kay nakabantay ang mga nanag-iya sa balay.

Saysay niini sa usa ka sibyaan sa radyo nga kalit lang midahili ang yuta hinungdan nga natabunan ang mga panimalay nga gipanag-iyanan nila ni Ronald Sumante, Ronelle Haniway, Edith Haniway ug Noli Balotic.

Gibutyag ni Sumante nga ang balay gyod ni Haniway maoy natabunan og yuta samtang ang tulo partially damaged lamang.

Maayo na lamang deretsong nakabakwit ang pamilyang Haniway labina giingong ang asawa niini pipila ka adlaw lamang gikan nanganak.

Gipasabot usab ni Sumante nga daan na siya nipahimangno sa kadelikado sa ilang dapit sa nga magdahili ug nahitabo gyod hinuon ang insidente.

Sa pagkakaron gisilong sa Barangay Hall sa dapit ang upat ka pamilya nga apektado sa landslide diin aduna na usab giandam nga ayuda alang kanila.