SA pagsaulog sa kapistahan ni Señor Sto. Niño, si Cebu Archbishop Jose Palma nagpahinumdom sa katawhan sa pag-atiman sa kabataan ug sa mga gagmay ug mahisama kanila.

Sa iyang wali atol sa pontifical mass sa Basilica del Sto. Niño kagahapon, ang arsobispo nagkanayon ang panagtigom sa mga tawo sa kapistahan sa Balaang Bata panagtigom sa pagdayeg ug pagpasalamat.

Daghang mga rason angay pasalamatan ang Sto. Niño, matod niya, sama sa mga grasya nga nadawat, spiritual ug physical healing ug ang maayong panahon nga nasinati kagahapon.

“We can only thank God for we know this is the God that loves us through the Señor Sto. Niño,” pagpasabot ni Palma.

Sa forecast sa Pagasa Mactan, ang Sugbo makasinati og pag-uwan atol sa Sinulog Grand Parade tungod sa bagyong Agaton, apan sukwahi ang nahitabo tungod kay igo lamang nihabohabo kagahapon.

Kini usab ang nahitabo sa ubang mga kalihokan sa kapista­han sa Mi­lagrosong Bata sama sa Traslacion niadtong Biyernes, Fluvial ug so­lemn procession niadtong Sabado.

Base sa ebanghelyo ni San Lukas kagahapon, si Palma nipahinumdom sa katawhan sa pag-atiman ug pag-alima sa mga bata, sa way mga tingog, way gahom, ug mga kabos.

Ang iyang gipasabot nga way tingog mao ang mga yanong mananagat, mag-uuma, mamaligyaay, ang nangatog daplin sa aseras, masakiton, ug ang mga bilanggo.

Iyang gipaambit ang gisulti sa Sto. Papa, “We are called to find Christ in them, to lend our voice to their voices. But also to be their friends, to listen to them, to speak for them and to embrace the message God speaks to us through them.”

Sa wali, iyang gilakbitan nga dinhi sa Pilipinas dunay kultura nga di lamang wa tugti nga motubo ang kabataan kon di wa usab sila tugoti nga matawo pinaagi sa pag-aprobar sa kontrobersiyal nga Reproductive Health Law nga wa pa mapatuman ug nag-ungong karon sa Korte Suprema ingon man ang pagpresentar sa mga divorce bill.

Si Palma namalandong nga ta­nang mga tawo sa mata sa Diyos pulos mga bata.

“Ang kamatuoran people of God we are like little children..Bisan ako arsobispo, dunay pulitiko, dagko nga negosyante, popular nga professional, gamay ra kita atubangan sa Dios,” pamalandong niini.

Siya nidugang ang Sto. Niño maoy paglaom sa katawhan ug kita mga tawo puno sa paglaom.

Ang paglaom nga gipaabot sa mga tawo mao ang mga maayong butang tungod kay gihigugma kita sa Dios ug ang paglaom molungtad.

Siya niawhag sa tanan nga di lamang maglaom og maayong mga butang alang sa kaugalingon kon di apil usab ang komunidad nga ang iyang gipasabot ang mga dapit nga naapektuhan sa linog ug bagyo sama sa Sugbo, Bohol, Leyte, ug Samar.

Sa wali, iya usab gibalik og sulti ang iyang gipaambit sa nangaging katuigan nga “the clergy needs the laity, the laity needs the clery. The province needs the city and the city needs the province. The capital needs labor and the labor needs the capital. The young needs the old and the old needs the young. We need one another.”