TUNGOD sa nasinatian nga mga kalamidad, duna karoy giduso nga balaudnon ang duha ka magbabalaod sa Kongreso aron nga makubsan ang epekto niini sa komunidad.

Ang House Bill 3648 nila ni Bayan Muna Representatives Neri Colmenares ug Carlos Zarate gilauman nga dako og mahimo sa pagluwas og kinabuhi panahon sa kalamidad.

Kini mao ang pagtukod og lig-on ug makapugong sa bagyo nga mga evacuation centers nga ipahimutang sa layo sa katubigan ug kabukiran sa matag duha hangtud tulo ka contiguous barangays.

Namatikdan man god nga kasagaran nga himuong evacuation center sa mga tawo mao man ang mga tulunghaan ug mga gymnaseum nga huyang sab nga makasagang sa kalamidad.

Gawas pa, apektado sab ang pagtungha sa mga kabataan ilabi na kon di pa mamahawa ang mga bakwit kay wala pa mahuman ang pag-ayo sa ilang mga balay o kaha lutaw pa sa tubig ang ilang mga lugar.

Kuhaon sab ang serbisyo sa mga eksperto nga maoy modesinyo sa mga center nga makasugakod sa bagyo pinaagi sa paggamit og mga materyales nga lig-on.

Maayo baya ning nahunahunaan sa atong mga magbabalaod ning panahona. Kinahanglan gyud nga magtukod ang kagamhanan og lig-ong mga gambalay nga kapuy-an sa mga bakwit panahon sa katalagman.

Kay sayud kita nga ang mga tulunghaan ug gymnaseum, base sa kasinatian, di na kasaligan nga himuong evacuation center kay usahay mahimo pang mitsa sa pagkakalas og kinabuhi sama sa nahitabo didto sa Leyte atol sa Bagyong Yolanda nga nangaguba sa dagkong balud ug hangin.

Mas nindot nga modesinyo na og bag-o ug modernong gambalay ang kagamhanan tungod kay nagkakusog ug nagkadako na ang epekto sa climate change.

Angay nga kon maaprobahan na kini sa mga magbabalaod, lihukon dayon kay alang man kini sa kaayohan sa tanan. Kay basin unya og mahulog ra kining kutob ra sa baba apan wala sa buhat.