DAVAO DEL NORTE -- Subling nangandam ang mga otoridad sa Davao del Norte kagahapon gumikan sa hulga nga ihatud sa Bagyong Agaton.
Gideklara ni Governor Rodolfo del Rosario ang suspensiyon sa klase gikan pre-school hangtud na sa high school sa tibuok probinsiya human nalakip storm signal number 1 sa pipila ka mga lugar sa Mindanao.
Samtang hugot nga nag-monitor ang Provincial Disaster Risk Reduction and Management Council (PDRRMC) sa lebel sa tubig sa kasapaan aron masuta kon duna bay pagtaas niini.
Nasayran nga sa tanang mga suba sa probinsiya, bugtong ang Saug River pa lang ang na-monitor nga dunay pagtaas sa lebel sa tubig nga miabot sa 0.8 meters.
Subli sab nga nanawagan ang mga otoridad ngadto sa publiko nga mag-igmat ug mosunod sa pahimangno nga mobakwit gilayon sa dili pa mohapak ang kalamidad sa ilang mga lugar.
Apan kagahapon sa udto, gibawi na sa Pagasa ang tanang storm warning signals sa Agusan del Sur, Davao Oriental, Davao del Sur ug Davao del Norte human mihanay ang bagyo nga si "Agaton," nga nahimo na lang nga low pressure area (LPA).
Sumala sa Pagasa, katapusang namatikdan ang sentro sa mga panganod sa gilay-on nga 400 kilometro sa habagatang-kasadpang-habagatan sa dakbayan sa Davao o 455 kilometro sa habagatan sa siyudad sa General Santos.
Apan taliwala niini, padayon gihapon ang pagpahimangno sa mga otoridad sa mga pag-ulan nga hatud sa weather system.
"The low pressure area is expected to bring moderate to occasionally heavy rains and thunderstorms over Northern Mindanao, Caraga and Davao Region."
Hugot sab nga gipasidan-an ang mga barko o sakyanang pangdagat nga magbantay sa di damhon nga pagkusog sa mga balud sa kadagatan, ilabi na gyud sa mga seaboards sa Luzon, Visayas ug Caraga region. (Teddy Cabana)