PADADA, Davao del Sur -- Usa ka drayber sa traysikel ang nakabsan sa kinabuhi samtang naangol sab ang tulo niya ka pasahero human aksidenteng nabanggaan sa depasaheroang bus.
Nahitabo ang aksidente alas 9:30 sa milabay nga gabii didto sa Digos-General Santos City national highway, atubangan sa tunghaan sa elementarya sa Barangay Northern Paligue sa lungsod.
Nalambigit sa disgrasya mao ang Holiday bus nga nagbaton sa plakang MWB 590 nga narehistro sa Davao Holiday Transport Services, ug gimaneho ni Cirilo Birondo Luna, 34, ulitawo nga taga Sitio Molabe, Barangay Talos, lungsod sa Malungon, Sarangani Province.
Samtang ang Kawasaki nga traysikel nga way plaka, gimaneho sa 58-anyos nga si Erebirto Ramo Bastatas, minyo, ug molupyo sa Purok 2, Barangay Poblacion, Sulop.
Subay sa inisyal nga imbestigasyon sa traffic section sa Sulop Police Station nasayran nga mi-overtake ang depasaherong bus sa laing sakyanan apan nasungag ang gikasugat nga traysikel.
Gibutyag sa mga nakasaksi sa hitabo nga nalimbuwad ang traysikel ug nakabsan dayon sa kinabuhi ang drayber.
Samtang mga pasahero nga naangol mao sila Roel Campomanes Villasan, 19, taga Purok 2, Poblacion, Sulop; Aljon Bucio Fornolles, ug Joar Tolete Sana.
Mga nahisgutan nakahiagum og mga pangos ug bun-og sa kalawasan hinungdan nga gidala gilayon sa South Davao Medical Center Specialist sa lungsod.
Samtang ang patay nga lawas sa drayber gipailawom na sa otopsiya didto Sa Villa Funeral Homes sa Sulop.
Gikustodiya gilayon sa kapulisan sa Padada Police Station ang drayber sa bus samtang gihulat ang himuong lakang sa mga pamilya sa mga nabiktima. (Orlando B. Dinoy)