INTERESADO si Saranggani Rep. Manny Pacquiao sa boxing team sa Cebu Provincial Detention and Rehabilitation Center.
Kini maoy gibutyag ni Capitol consultant on jail matters Marco Toral.
“Interesado siya pagkahibawo nga naay boxing team,” matod sa consultant sa dihang gikahinabi sa Sun.Star Superbalita.
Matod ni Toral nga si Jover Pontino maoy misulti kaniya kalabot sa interest ni Pacquiao ngadto sa bag-ong natukod nga boxing team.
Si Pontino nga taga General Santos, suod nga higala sa Pambansang Kamao. Higala usab siya ni Toral nga maoy instrumento sa proyekto pagporma og boxing team sa CPDRC.
Sa pagsugod sa team, niabot og 84 ang mga priso nga gustong mahimong boxer apan matod ni Toral, human sa medical exam ug training, niabot na lamang og 47 ang nahibilin sa team.
Matod niya kini ang labing una ug bugtong boxing team sa tanang prisohan sa Pilipinas.
Karong Huwebes, mobisita sa CPDRC ang kongresista ug personal nga motan-aw sa three-rounder fights sa top 6 boxers sa prisohan, butyag sa consultant.
Sugdan ang kalihokan alas 2 sa hapon pinaagi sa sinukliay sa mga kumo dayon ang pasundayag sa mga dancing inmate nga pulos mga bag-o ang kanta ug sayaw.
Human niini, kantahon ang “Para sa ‘Yo” nga awit ni Pacquiao, sa dili pa niya sugdan ang praise and worship.
Siya niasoy nga nangalipay ang mga bilanggo pagkasayod nga duawon sila sa Pambansang Kamao.
“Siyempre idol gud na nila si Pacquiao, gusto sad sila ma-boxer ug mapareho niya,” dugang niini.
Si Toral niingon ang tanang 1,816 ka inmates moapil sa kalihokan.
Sa dili pa molahos sa CPDRC, mag-courtesy call una si Pacman ni Gobernador Hilario Davide III ala 1 sa hapon sa Kapitolyo.
Sanglit adlaw sa tingduaw ang Huwebes, mahimo usab makasaksi sa kalihokan ang mga dalaw sa mga priso diin mahimo sila mopahimutang sa pasilyo.
“It will be historic! This is the first time that they will experience this one,” pahayag sa opisyal.
Si Toral nipasalig nga higpit ang seguridad nga ipatuman sa maong adlaw diin full force ang personnel sa CPDRC ug nangayo sila og backup sa Special Weapons and Tactics sa Cebu Provincial Police Office.
Imbitado usab nga mosaksi sa kalihokan si CPPO Director Noel Gillamac ug Mandaue City Police Office Chief Petronelli Baldebrin ug ubang mga opisyal sa Kapitolyo.