GILANGKAT sa Lumad Basakanon ang kampyonato sa Sinulog Free Interpretation (SFI) samtang gisakmit usab sa Placer, Masbate ang Sinulog Based Category (SBC) sa ika-34 nga Sinulog Festival sa dakbayan sa Sugbo.
Ang Lumad Basakanon sa barangay Basak San Nicolas usab ang nikampyon sa Street Dancing category ug gisundan sa Sinanduloy Cultural Group sa Tangub City ug 3rd placer ang Kulturang Placereño sa Masbate.
Ang Lumad Basakanon nidawat sa ilang tropeyo ug P2.1 milyones nga premyo nga naglangkob sa street dancing ug Sinulog based nga tag P 1 milyon lakip na ang P100,000 nga best in custume.
Ang Masbate nakadawat og P1.5 milyones ug tropeyo sanglit ang Tribu Himag-ulaw sa Placer maoy nahimong 2nd place sa free interpretation.
Nikumpleto sa 3rd place sa free interpretation ang Abellana National School (P300,000) ,4th ang Tribu Subanen sa Plaridel, Misamis Occidental (P200,000) ug Banay Talambanon sa ikalimang dapit (P100,000).
Nahimutang sa 2nd place sa Sinulog based ang Tribu Sinanduloy sa Tangub City; 3rd place ang Municipality of Tuburan; 4th place ang Carcar City Division; ug 5th Place ang Talisay City Central sa SBC.
Ang mga premyo sama ra kadaku sa mga ganti nga nadawat sa free interpretation category.
Niadtong 2013, ang Tribu Lingganay sa Alang-Alang, Leyte maoy kampyon sa free interpretation apan wa sila makadepensa karong tuig gumikan sa bagyong Yolanda samtang wa madepensahi sa Sinanduloy Cultural Troupe sa Tangbu City ang ilang korona sa Sinulog based.
Ang Lumad Basakanon taodtaod nang wa makampyon human nila gihuptan ang maong posisyon sulod sa dugay nga katuigan.
Nahimo silang 2nd placer niadtong 2013 ug 4th placer niadtong 2012 apan subli nila karong nasakmit ang kampyonato.
Ang mga local chief executive sa mga out-of-town contingents moay nidawat sa mga
tropeyo ug tseke gikan sa Sinulog Foundation ug Cebu City Government pinangulohan ni Mayor Michael Rama isip chairman.