KAGAHAPONG’ adlawa nagpabilin nga suspendido ang klase sa pre-school ug elementarya dinhi sa siyudad sa Cagayan de Oro apan balik sa normal ang klase sa mga piniling tunghaan sa high school.
Atol sa paghapak sa Bagyong Agaton ning siyudad sa Cagayan de Oro, gideklarar sa Cagayan de Oro Disaster Risk Reduction Management Council (CDRRMC) ang code red diin nagpasabot nga kinahanglan na gyod nga mobakwit ang mga residente nga nanimuyo duol sa suba, sa mga landslide prone area kini tungod sa walay hunong nga pag-ulan sugod pa sa kadlawon hangtod sa alas 4:00 sa hapon niadtong Lunes.
Gibutyag ni Mario Monsanto kinsa hepe sa CDRRMC nga kini aron masiguro nga walay kaswalidad sa pagsaka ug kusog nga bul-og sa tubig.
Sa kinatibuk-an, adunay 2,092 ka mga pamilya ang gisilong sa nagkadaiyang evacuation centers diin mokabat sa 8, 268 ka mga indibidwal.
Nakadawat usab ang mga barangay nga nabahaan og mga relief goods diin sulod bugas ug mga de lata.
Daw susama usab sa tubig dagat ang nahitabo sa nagkadaiyang parte sa siyudad sa Cagayan de Oro human misaka ang mga tubig sa creek ug mibaha ang mga kadalanan.
Samtang gikabalaka usab ni Dansolihon Kapitan Gilbert Nacalaban ang upat ka mga landslide nga natigayon sa upat ka mga sitio sa iyang barangay.
Nihangyo kini sa kagamhanang lokal nga unta mahatagan siya sa pagtagad tungod kay dili maagian ang pipila ka mga kadalanan human natabunan gumikan sa landslide.
Samtang basi sa report sa Philippine Atmospheric, Geophysical Astronomical Service Administration (Pagasa) ang Bagyong Agaton nahimo na karon nga low pressure area hinungdan pabilin gihapon nga masinati ang pag-ulan ulan dinhi sa pulo sa Mindanao.(SVB)