ANG Association for the Advancement of Karatedo (AAK) Davao nakakuha og tulo ka bulawang medalya, upat ka plata ug duha ka bronzes sa 2nd Adidas Adidas International Cup didto sa Makati Coliseum niadtong Dominggo.

Sila Josh Andrew Worsley, Gabriel Quinones ug Carmela Marie Estarija mibulsa og bulawan sa ilang tagsa ka events.

Gipildi ni Worsley sa St. Paul College sa boys 6-7 kumite ang taga Singapore samtang si Quinones sa Brokenshire College mihari sa cadets -57 kgs kumite batok sa Indonesia, 7-0 ug Estarija sa Stella Maris Academy of Davao gipalukapa ang JKI (Shito) karateka sa girls open kumite event.

Naka-bronze sab si Qui¤ones sa kata samtang napildi si Estarija sa Japan Ana Tan sa AAK-Megamall alang sa platang medalya sa kata.

Sila Precious International School of Davao (PISD) John Paul Ponce ug Julian Ambrose Ramirez nakasungkit og plata sa duha ka adlaw kompetisyon.

Si Ponce ikaduha sa boys 8-9 kata ug kumite events diin Filipino-Japanese Naoki Alforte sa AAK-DLZHS ang miuli sa bulawan samtang Ramirez nakaplata sa boys 12-13 kumite human mapakyas sa JKA-Lipa magduduwa sa finals.

Kinatibuk-ang 12 ka tims ang miapil sa torneyo lakip na ang Singapore ug Indonesia.

Nagpasalamat si AAK-Davao chief Rommel Tan sa mga misuporta sa tim sa Zoofari, Outback Grill, Charlie and Gloria Estarija, Edgar ug Maethel Ponce, Jay ug Joan Ramirez, Mr. ug Mrs. Quinones, Beefit Gym, Tomas Electrical ug TKS Petron. (MLSA)