PATAY na nga napalgan ang usa ka inahan niadtong Martes sa gabii sa baybayon nga bahin sa Barangay Casinglot, lungsod sa Tagoloan, Misamis Oriental human naanod sa baha niadtong Lunes sa gabii.
Giila ang biktima nga mao si Marites Aguale, 32, taga Sitio San Isidro , Barangay Solana, lungsod sa Jasaan, Misamis Oriental.
Sa inisyal nga imbestigasyon sa Tagoloan Police Station ubos ni Police Senior Inspector Maricris Mulat, nasuta nga ang biktima nilagom na ug nakaangkon og bun-og sa lawas nga posibleng nabangga sa mga bato sa suba.
Ang inahan niini nga mao si Roquisa kinsa nidangoyngoy nga misaysay niingon nga niadtong Petsa 20 sa hapon mitugbong sa lungsod sa Tagoloan ang iyang anak ug mga alas 7:00 sa gabii mobalik na unta sa San Isidro kuyog ang laing usa ka igsuon niini, apan sa dili pa moabot sa puloy-anan niini kinahanglan pa nga motabok sa suba sa Solana, lungsod sa Jasaan.
Naaghat ang magsuon nga motabok human nakitang adunay mga tawo nga nanabok usab sa suba.
Misunod usab si Marites ug magulang niining lalaki apan taga dughan na ang suba ug kusog ang bul-og sa tubig baha.
Gipataas usab ni Marites ang iyang dala nga bag aron dili mabasa kay adunay sulod bugas nga usa sa iyang gitugbongan sa Tagoloan kay giingong kinahanglan niining ulian ang iyang tulo ka mga anak nianang gabhiona kay wala nay lung-agon.
Apan mas mikusog ang bul-og ug nakatunob kini sa lawom nga bahin hinungdan sa pagkaligid niini. Gianod ang biktima sa kusog nga bul-og sa tubig.
Ang magulang niini halos gibasol ang iyang kaugalingon tungod kay wala naprotektahan ang igsuon nga bisan unsaon niya og pangita wala na kini makita.
Martes, Enero 21 mga alas 7:00 sa gabii nakita na kining walay kinabuhi sa baybayon nga bahin sa lungsod sa Casinglot.
Dugang ni Roquisa nga gipangita kini nila sa baybayon sa Jasaan ug lungsod sa Villanueva apan diay sa Casinglot, lungsod sa Tagoloan lang diay kini napadpad.
Ang patayng’ lawas sa biktima ning panahona ang anaa gidala sa Everlasting Funeral Homes sa lungsod sa Tagoloan.