DASIG ug malamposon ang paglusad sa Boses Tinig Pinoy sa RPN-DYKC nga akong gialagaran. Panagtigi sa awit nga walay instrumento nga moduyog. Enero 16, motorkada subay sa kadalanan sa Mandaue ug siyudad sa Sugbo. Interview sa roadshow hosts nga mga popular nga mag-aawit sama nila ni Aileen Papin, John Nite ug Anthony Castelo. Enero 17 ang pagsubo sa bag-ong edipisyo sa transmitter sa Umapad, Mandaue alang sa pagpahiluna sa 10,000 watts nga gikusgon sa signal. Gisundan sa press conference nga gitambongan sa mga entertainment writers nga gipahigayon sa Jonies sa J Centre Mall, AS Fortuna St., Bakilid, Mandaue diin gisunod ang contest sa boses inacapella.

Gitambongan sa daghang mga tawo nga nagsuporta sa DYKC. Mipakita sa ilang talento sa pag-awit ang midaog sa duet nga sila si Jose Thaddeus Roble III ug Sheena Luz Comabig ug sa trio nga sila si Ian Mark Corales, Driane Paul Saberon ug Niña Claire Rivaca.

Polos gilangkat sa taga University of San Carlos. Boses Judges sila si Coach Joy Unchuan, Jeffrey Comillas, Kirk Philip Tarona, Niño Matillano ug Ariel Liboon.

Hagdanan sa kabantog nga giumol sa presidente ug Chief Executive Officer Robert Rivera

nga gisalmotan sa mga estasyon sa RPN9 sa tibuok Pilipinas. Semi-finals adto sa Lim Ket Kai, Cagayan de Oro sa Pebrero 22. Grand finals sa Manila SM Aura sa Marso 22.

Higayon sa dunay talento sa pag-awit sa edad nga 15 anyos pataas. Ibuga ang gasa sa kahitas-an aron molutaw sa kapunaw-punawan sa kabantog.

* * *

Nahugno ang mga kontraktors sa kapitolyo nga wala bayari sa kantidad nga P607.239M kay giingong walay pagtugot sa hunta probinsyal. Hinoon mokuha silag panahom sa COA ug DILG. Si Vice-Gov. Agnes Magpale nabalaka nga maapektohan ang nag-unang programa ni Gov. Junjun Davide ang pagpalambo sa health care system kon dili mabayran ang WTG nga nagtrabaho sa Balamban Provincial Hospital ug Supreme ABF Construction nga maoy nagtrabaho sa Danao Provincial Hospital kay gihunongan man. Apan ang maong mga tambalanan proyekto ni Gov. Gwen Garcia ug dili kang Davide. Ang WTG maoy nagtrabaho sa Cebu International Convention Center (CICC). Ang Supreme ABF maoy nagtam-ok og anapog sa Balili, Tinaan, Naga. Basin nalimot ang provincial board nga dunay gahin nga ilang gipasar sa 2010, 2011 ug 2012 ubos sa Airport, Seaport ug Economic Enterprise Site Development Program. Dalan ba sa kaangayan ang pagnigar sa provincial board?

Si Bokal Gigi Sanchez sa Committee on Budget and Appropriations miingon nga mikunhod ang cash reserves nga P533.931M sa 2008 ug P158.657 nalang sa 2012 basi sa balance sheet sa general fund. Maayo siguro nga ayohon ni pagsubay og parihas ba sila og giiskuylahan bahin sa kwentada. Kay sa pagtugyan ni Garcia ngadto ni Davide sa renda walay utang ang kapitolyo sa mga bangko gawas sa naandang bayronon sa mga kontraktor ug supplier. Gihusayan ni Garcia sa pundo nga naglakip sa P791M sa salapi sa bangko apil na ang 17,728 dollar account, P351.069 general fund, P118,997M special education fund, P321.4M trust fund ug P28.1B nga assets.(csa_1156@yahoo.com/0905-250-4643)