GAHAPON gipahigayon ang katapusang bahin sa kalihukan sa kapistahan ni Senyor Santo Nino. Ang hubo nga gitambongan sa daghang deboto gahapon sa sayong buntag. Ang Rector sa Basilica Mimore del Sto. Nino Fr. Jonas Mejares maoy nangulo sa seremonyas. Ang hubo nagpasabot nga ang Senyor mag-ilis gikan sa senina nga gipahaom sa kapistahan ngadto na sa ordinaryo nga bisti. Parehas ra gud sa tawo nga mamista magsul-ob siya og nindot nga senina. Unyag kahuman sa fiesta balik na sab sa ordinaryo nga sapot.
Pangandam
Sa akong interview, gitug-an ni Padre Jonas nga nagsugod na ang ilang pagpangandam sa kapistahan sa Senyor para sa sunod tuig. Siya niingon ang 2015 nga kapistahan usa ka dakong selebrasyon sanglit sila nga kapariang Agustinian magsaulog man sa ilang ika 450 ka tuig nga pangalagad sa Pilipinas. Ug ang Basilica nga magsaulog sab sa iyang ika 50 ka tuig human ituboy sa Vatican ngadto sa pagkabasilica niadtong 1965: Dobli ang selebrasyon pun-an pa sa kapistahan mao nga si Padre Jonas wa sab mosalikway sa mga pangagpas sa uban basin si Pope Francis masayo pagduaw sa Sugbo aron mangulo sa maong selebrasyon.
Seguridad
Ang hepe sa Waterfront Police Station C/Insp. Wildimar Tiu nga maoy gitahasan sa pagbantay sa siguridad sa mga deboto atol sa kapistahan, niladlad sab sa iyang rekomendasyon unsaon pagpalambo sa kahapsay ug kalinaw sa Basilica para sa sunod nga kapistahan. Nagtoo si Tiu nga modobli pa ang gidaghanon sa mga deboto nga motambong og novena, misa og prosisyon sunod tuig. Usa sa iyang girekomendar mao ang pagbutang og CCTV Camera sa palibot sa Basilica. Pananglit diha sa Osmeña Boulevard mamonitor na ang mga tawo nga magpunsisok sa karsada.
Sa may Magellan’s Cross butangan sab. Ang akong ikatampo kang Major Tiu nga iapil niya pagrekomendar nga wala na gyuy tugutan nga makaparada nga sakyanan mga 500 metros gikan sa Basilica. Sa ingon ini nga paagi wala nay sagabal sa paglakaw sa mga manimbahay. Lain nako nga isugyot ngadto sa kaparian sa Basilica ipatuman ang lagda sa tukma nga senina nga isul-ob sa mga manimbahay. Naay uban puerting mobo-a sa sayal. Ang ubang lalaki og babaye mag short pants lang. Ang uban pinakita ang dughan. Kamo nga nakasimba didto nakabantay nga daw nagshopping sa mall ang uban basi sa ilang seninaan.