DILI masayop, ug dili angay but-an kon unsa’y angay buhaton. Labi na’g magtuo nga gamhanan, ay, samot gyod kahabog ang pagtan-aw sa kaugalingon! Mao ra’g duna sila’y dili-ingon-nato nga kinaiya.
Ilaha pod na! Mao tingali na’y atong masulti kasagaran kabahin sa mga bantogan, labi na kay mao ra’ lahi ra gyod ilang kalihokan nga dayag kanunay sa kadaghanan. Kon unsa ilang buhaton—bisan pa’g magtuwad-tuwad—matagaan dayon og katilingbanong pagtagad.
Sama sa gikataho nga hinanggaw ni Justin Bieber bag-ohay lang, pwera buyag! Bisan wa’y igong lisensya sa pagmaneho, gapalabyog gihapon siya didto sa usa ka da’n sa Miami Beach gikan nakayarok og makahubog. Dihang gipasanginlan siya nga “driving under the influence” (DUI), nisuki pa gyod siya sa kapolisan dihang gisikop. Kon kabalo pa siya mag-Binisaya, kuyaw pod og masinghagan niya ang mga tigpatuman sa balaod: “Magbuot ka nako?”
Iyaha pod nang taras! Labi na kay linghod pa’g pangisip, masabot ra nato’g gamay kon wala pa siya’y igong kabuot sa iyang pagbagutbot. Apan kanang yam-angan nga yawyaw lisod dawaton kon kini gikan sa usa ka hamtong nga sinaligan sa dakbayan. Bisan pa’g motigi sa kaambongan ni Justin si Mayor Mike Rama, salikwaot paminawon kon tuyo niyang palabwan si Justin sa binagis nga paugat.
“Nganong magbuot man sila nako? Dili ko magpabuot!” Kini ang nasayran nato nga gipamulong sa mayor mahitungod sa Konseho nga buot mopatuman sa City Ordinance 1829—gakinahanglan sa tanang taga-City Hall nga mosanong sa tinuig nga“Random Drug Check-Ups.” Kay lakip man tuod sila sa sinuholan sa City Hall, ang mga sakop sa Konseho nitugyan sa ilang kaugalingon sa usa ka “drug test.” Maayo nuon kay aron mapamatud-an sa katawhan nga dili adis-adis ang ilang gitahasan sa pangagamhanan ug angay tuod saligan. Nan, dayag nga timailhan pod unta sa iyang pagkaligdong ug pagkamatinud-anon sa iyang panaad nga mangalagad sa mga Sugboanon kon ikalipay pod sa Mayor ang pagbuhat kon unsa’y gisugdan sa Konseho nga tinarong.
Maayo na lang kay gapa-“drug test” ra pod baya ang Mayor. “Pakuha raman diay siya, nganong pakipot pa sa sinugdanan,” matod pa ni Konsehal Alvin Dizon. Mao nga usik-usik lang gyod sa laway ang yawyaw sa Mayor, ug kuyaw masaypan siya ug mapasanginlan—bisan di tinuod—nga siya sapoton, mahiubos dayon, ug mapahitas-on og sinultian. Duna’y “public image”—sama ni Justin —ang pamunoan sa dakbayan tugbang sa tulobagon nga “public service.” Apan lahi ra tan-awon ug lain paminawon kon gatahap ta nga ang atong kadagkoan basin gahambin og gamay nga panimuot ni Justin.
(geemyko@gmail.com)