SA iyang wali sa Hubo Mass niadtong Biyernes, si Fr. Jonas Mejares sa Basilica Minore del Santo Niño mihagit sa katawhan nga magtinabangay aron molambo.

Tingali sa katawhan, deboto man ni Sr. Sto. Niño o di, makatuhop kining mao nga mensahe. Sa pribadong sektor, napakita ang kasingkasing dihang ang nagkadaiyang mga organisasyon, grupo ug kompaniya, nanabang sa mga biktima sa bagyong Yolanda.

Apan ang kadtong mga pulitiko, mga tawo nga naa sa kagamhanan, makatuhop kaha kanila ning mao nga mensahe?

Sa ikaupat nga quarter nga survey sa Social Wea­ther Station (SWS), 17.2 porsyento sa mga tawo niingon nga sila nagutman. Sa ato pa, dunay mga panahon nga wa silay pagkaon diha sa ilang talad kan-anan.

Lisod kaayo nga makab-ot ang paglambo sa pagpuyo kon ang nagpasulabi sa galamhan sa mga opisyal sa kagamhanan mao ug kahakog. Ang dayag ug institutionalize nga graft and corruption gikan sa labing ubos nga sanga sa kagamhanan ngadto na sa labing taas, nagpugong sa nasod sa pagtungtong ngadto sa kalampusan nga maghatag unta sa iyang katawhan sa kaharuhay sa pagpuyo.

Hangtod naa pa ang gamot sa sakit nga mao ang pangurakot ug pangilkil sa matag buhatan sa kagamhanan, di makapaabot ang katawhan og

kaharuhay sa pagpuyo.

Kon naa man ugaling, ang pipila lang nga naa sa taas nga hut-ong sa katilingban ang makatagamtam.

Bitaw, ang tinud-anay nga babag sa dugay nang gipangandoy nga kaharuhay bisan sa labing ubos nga hut-ong sa katilingban, mao ang pangurakot.