Estrella Dolores
DIHANG duol na ang gisakyan niyang taksi sa airport may tulo ka mga tawo nga mingbabag sa dalan. Mihunong ang taksi. Bugnaw pa kaayo ang hangin sa kabuntagon nga mihaplos sa nawong ni Baldo dihang giablihan niya ang pultahan.
“Kanaog mo! “Singka sa usa ka tawo nga nagbansiwag og pistola. “Aron di mabalbag ang inyong ulo, tulis ni!”
Nanaog si Baldo dala ang maleta. Sa pikas pultahan migawas ang drayber. “Ipagawas ang inyong kuwarta!” Singgit sa usa nga nagbitbit sad og pistola. Ang ikatulo nagtutok kaniya.
Nakahunahuna si Baldo sa pagsukol, apan nakita niya nga duha ang may pistola. Mibalik ang drayber nga nagkurog aron pagkuha sa kuwarta “
Heps, di ikaw, Pare, kuhaa ang kuwarta tua sa atubangan sa taksi.” Daling milipot ang usa ka tulisan ngadto sa atubangan sa taksi.
“Ang imo!” Gitiunan si Baldo sa tulisan. Gikuha ni Baldo ang iyang pitaka ug gihatag sa tulisan. Giitsa kini sa tulisan sa iyang kauban ug nasawo, dayon gihiling ug gihulbot ang kuwarta. Giihap. “Dako Boss, P20,000 ang tanan ug kining plane ticket atong ibaligya.” Unya, miduol ang usa nga nagda sa kuwarta sa drayber.
“Ang kwarta, Boss, P5,000. “Sige, sibat na ta,” mando sa nagti-on ni Baldo. Daling nanibat ang mga tulisan. Nangagho ang drayber. Si Baldo nagpanakla kay nada ang iyang mga ID ug ang plane ticket.
Arang-arang na lang kay may kuwarta siyang gisukip sa secret pocket nga P 10,000.00 ug P10,000.00 sa sud sa iyang maleta. Ang iyang cell phone sa bulsa wa kuhaa. Nakalimot ang mga tulisan.
Nagbaklay na lang si Baldo padung sa airport kay duol na man kini. Salamat bisag dugay kay nakalukat siyag emergency ticket sa sulod sa sugyot ug giya sa airport police nga iyang gisumbongan sa nahitabo. Nakalarga siya sa ikatulong flight sa buntag busa makatambong siya sa usa ka national conference sa mga cement plant sa nasod diin siya ang gipada sa ilang planta. Kining maong conference mohangtod og pipila ka mga adlaw.
Pagka udto puwerteng minatay sa iyang asawa nga si Celia. Kay nakuwag ang mga kawani sa planta sa balita nga na-crash ang gisakyang ayroplano ni Baldo. Gisusi sa buhatan ang flight ug mga ticket number sa mga pasahero. Nakasakay gyud si Baldo sa primerong flight sa buntag suma sa passengers’ list.
Wa madag alam-alam sa iyang mga ginikanan si Celia. Kada adlaw kining naghilak uban sa iyang anak nga si Harold. Daghan sad ang naguol sa mga kawani sa planta labi na ang mga sakop ni Baldo. Naila si Baldo nga usa ka maayo, kugihan ug masinabuton nga tawo.
“Nganong gibiyaan mo kami Baldoooo! Huh..Huh..Huh.. Ikaw ra ang akong gihigugma. Di na ko makakitag bana sama kanimo, guwapo ug buotan.
Pastilan, kabanyaga sa kapalaran! Huh..Huh..” Hilak ni Celia nga misiak sa kahilom sa sayong kagabhion sa ilang dapit. Human na ang pangadye, apan si Celia nagsige lag hilak nga way pugong-pugong matag gabii.
“Naunsa ka Celia nga nagminatay ka diha, ania na ko.” Milingi si Celia ug mihana sa pagdagan. “Kalag, ania ang kalag ni Baldo!
Nagmulto ang akong bana!” Singgit sa kahadlok ni Celia. Gigunitan si Celia ug gigakos ni Baldo.” Celia ako ni!”
Nakaamgo si Celia sa gakos ni Baldo. Milurang ang kahadlok niini. “Ikaw ni Balds!”
“Suginlan unya tika sa nahitabo nganong wa ko makasakay sa na-crash nga ayroplano. Apan sa di pa, tana una sa lawak kay gihidlaw ko nimo.”
Gisapwang dayon ni Baldo si Celia padulong sa ilang lawak samtang ang asawa hugot kaayong migakos kaniya. Mihawok-hawok pa sa iyang mga ngabil nga nakapagigil pagsamot kaniya. (Katapusan)