DAVAO CITY -- Ubay-ubay ang mipatala sa gipahigayong nationwide early registration sa Department of Education (DepEd) kagahapong adlawa, Sabado.

Kini subay sa DepEd Memorandum Order No. 2, series of 2014 gipahigayon ang one day nationwide early enrolment sa tanang pangpublikong mga tunghaan sa nasud.

Dunay sa'y pipila ka mga pribadong tunghaan ang misalmot niini.

Kadto lamang mga estudyante nga mag-Grade 1, mag-Grade 7 ug mga transferees ang gipatala gumikan makonsidera na nga enrolled na ang mga daan nga mga estudyante.

Subay sa pasiunang’ impormasyon gikan sa DepEd Regional Office sa Davao Region nga malampuson ang gihimong early registration gumikan dunay mga ginikanan nga miadto sa mga tunghaan sa maong adlaw.

Tumong sa DepEd nga ilang mahibal-an ang gidaghanon sa mga bata nga madugang sa daan nga nagtungha aron ilang masulbad sa sayo nga panahon ang problema sama sa kakuwang sa mga libro, magtutudlo ug mga lingkuranan. (Jeepy Compio)