3 estudyante giluba sa ‘buang’

DAVAO CITY - Padayon karong gitambalan sa mga doktor ang tulo ka mga estudyante kinsa gipangdunggab sa giingong dunay diperensiya sa pangisip alas 5:55 sa hapon niadtong Biyernes didto sa Ma-a Highway, atubangan sa NCCC Mall, Matina, siyudad sa Davao.

Ang mga biktima mao sila Mykee Laroda Antipasado, 21, molupyo sa Davao Housing, Toril, Arianne Victorina Ang Liberato, 20, molupyo sa Azalea Compound, Bugac, Ma-a ug Loreto Paragoso Martin, 16, residente sa Alpha Homes, Matina Aplaya.

Subay sa inisyal nga imbestigasyon sa Talomo police nasayran nga pulos mga estudyante ang tulo kinsa ang duha kanila naghulat og masakyan nga dyip padulong sa ilang dapit. Samtang si Martin mao pay pagkanaug sa gisakyan nga dyip.

Matud pa nga kalit lang giduol sila Antipasado ug Liberato sa wa pa mailhing lalaki kinsa dunay dalang hinagiban ug gidunggab sa makadaghang higayon.

Si Martin nga maoy pagkanaug sa dyip, giapil sab og luba sa suspek.

Daling misibat ang suspek kinsa wa'y sinina padung sa Le Jardin Subdivision apan dali nga nasikop sa mga mirespondeng mga pulis.

Sila si Antipasado ug Liberato daling gidala sa Davao Doctors' Hospital samtang si Martin gidala sab sa Limso Hospital diin padayong gitambalan sa mga doktor.

Giingon sa kapulisan nga nalisoan og pangisip ang suspek nga maoy hinungdan nga nahimo niya ang pagpanunggab.

Gibalhog na ang suspek nga wala panganli sa selda sa Talomo Police Office samtang ilang gihulat ang pormal nga pagkuha kaniya sa psychiatry department sa Mental Hospital. (Jeepy Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph