SAMA sa gituohan, magsangka og balik sila si Filipino Manny Pacquiao ug American Timothy Bradley karong Abril 12 sa MGM Grand Garden Arena sa Las Vegas, USA.
Wala pa man tuo’y opisyal nga pag-anunsyo gikan sa Top Rank apan usa ka kasaligang tinubdan sa InterAksyon.com sa Amerika ang mikompirmar sa away.
Matod sa tinubdan nga sa sunod semana, gikatakda nang mobuhi og pormal nga pag-anunsyo si Top Rank boss Bob Arum.
Gani, asoy sa tinubdan nga aduna na’y eskedyul nga press tour ning maong away sa duha ka mga siyudad, sa Los Angeles ug New York sa sunod buwan.
Sa interbyu sa RingTV, nagkanayon si Arum nga niuyon na si Pacquiao sa mga detalye kabahin sa away.
“We’re finishing up. We finished up with Manny, and we’re finishing up with Bradley,” pasabot ni Arum. “So assuming we finish with Bradley, once we’ve got everything in place, then we’ll make the announcement.”
Sa premirong away niadtong Hunyo tuig 2012, si Bradley mipakaging sa kalibutan dihang iyang gilupig si Pacquiao pinaagi sa kontrobersyal nga split decision aron ilugon ang World Boxing Organization (WBO) welterweight title gikan sa Pambansang Kamao sa Pilipinas.
Apan bisan sa kadaugan, wala’y dungog nga nakuha si Bradley tungod alang sa kadaghanan, si Pacquiao ang midaog sa maong away.
Hinuon sa nagsunod niyang duha ka mga away, gipakita ni Bradley nga aduna siya’y saktong abilidad pinaagi sa paglupig nila ni Russian Ruslan Provodnikov ug Mexican Juan Manuel Marquez, pulos desisyon.
Si Bradley adunay 31-0, 12KOs nga rekord samtang si Pacquiao naggunit og 54-5-2, 38KOs nga baraha.