KOMPIRMADO na nga mag-away og balik sila si kanhi 8-time world champion Manny Pacquiao (55-5-2, 38KOs) ug American Timothy Bradley (31-0, 12KOs) karong Abril 12 sa MGM Grand Garden Arena sa Las Vegas, USA.
Mismong sila si Top Rank promoter Bob Arum ug president Todd duBeof ang mianunsyo niini kagahapon.
“I’m ready to get this fight camp started, but most of all, I’m ready for redemption,” asoy ni Bradley sa interbyu sa Los Angeles Times.
Sa premirong away niadtong Hunyo 9, 2012, gilupig ni Bradley ang Pambansang Kamao sa Pilipinas pinaagi sa kontrobersyal nga split decision.
Midaog man tuod siya apan inay dungog, mga pagsuway ang nadawat ni Bradley human sa away.
Kon di man gani tanan, kadaghanan sa boxing fans sa kalibutan ang nagtuo nga si Pacquiao maoy angayang midaog sa away.
Hinuon sa nagsunod niyang duha ka mga away, gipakita ni Bradley nga dili taphaw ang iyang abilidad.
Gilupig niya si Russian Ruslan Provodnikov pinaagi sa unanimous decision unya gisundan kini niya og split decision nga kadaugan batok kang Mexican Juan Manuel Marquez.
Sa iyang bahin, si Pacquiao nagtinguhang ipamatuod sa kalibutan nga dakong sayop ang judges sa premirong away maong iyang gipili kining awaya.
Ang fighting congressman modawat og $20 million guaranteed prize ning away samtang si Bradley, World Boxing Organization (WBO) welterweight champion, modawat og $6 million. Ang duha parehong adunay bahin sa kita sa pay-per-view.